EDITORYAL - Bisan para nalang sa mga nakalas

Nahimo karong isyu kining dinaliang pagpatukod og sementeryo diha sa luna nga gipanagiya sa dakbayan sa Sitio Catives sa Barangay Guba sa bukirang bahin sa Cebu City. Ang isyu nitumaw tungod sa matud pa pagputol sa kapin 300 ka punoan sa mga mahogany, nga sumala pang Konsehal David Tumulak mga gagmay pang punoan ug tinanom kini sa nagbantay sa luna.

Dunay kwestyon bahin sa pagputol sa maong mga kahoy kay walay pagtugot kuno gikan sa Department of Environment and Natural Resources, unya wala masunod ang mga environmental policies ug clearances gikan sa maong ahensya ingon man sa Central Cebu Protected Landscape (CCPL) ug Protected Area Management Board (PAMB).

Giingon nga daghan sa mga sam-ang karon sa siyudad dili na gustong manawat og mga ilubong nga minatay kay puno na sab sila kaayo tungod kay daghan nang gilubong nga mga namatay sa COVID-19.

Angay unta sab tan-awon nga dili man tanang nangamatay kwartahan nga maka-afford pagpa-cremate. Dinhi sa Cebu City duha ra ka punerarya ang dunay crematoriums ug kining tanan pulos pribado ug mahal ang bayad. Tungod kay duha ra, pipila ra ka lawas ang ilang maserbisyohan sud sa usa ka adlaw. Dili nila maato og apas pag-cremate ang mga nakalas tungod kay aduna pay daghang pending nga gibutang sa ilang mga freezers.

Kabahin sa freezers nga makahipos sa mga minatay samtang paaboton pa ang ilang schedule sa cremation, pila may gastos sa bayad sa tagtungod ana matag adlaw samtang napaabot?

Hinumdoman unta nga naglisod tanan ang katawhan karon, ug ang dugang galastohan bisan tuod para kini sa ilang mga minahal sa kinabuhi nga nitaliwan dili makatabang sa ilang sitwasyon.

Way kwestyon nga kinahanglang mosunod ang siyudad sa mga polisiya pagtukod og sam-ang. Apa apan tingali karong panahon sa pandemiya diin kada adlaw dunay nakalas, dili ba mahimong luag-luagan og gamay ang burokrasya?

Bisan nalang alang sa paghatag og gamay nga respeto sa mga nakalas sa maong sakit pinaagi sa paghatag kanila og desenteng pahulayanan?