EDITORYAL - Pait nga tambal

Karong adlawa gipaubos na sa general community quarantine ang nagkadaiyang mga lugar sa tibuok Pilipinas human sa kapin duha ka bulang higpit nga pagpatuman og enhanced community quarantine (ECQ) tungod sa coronavirus disease pandemic.

Gipaabot nga ang mingaw nga kadalanan ma-busy nasab tungod kay 50 porsiyento sa mga trabahante sa establisamento mamalik sa sa trabaho.

Kung daghang mga tawo, dako gyud kaayo ang peligro sa pagkatap sa COVID-19 kun lugakan ang pagpatuman sa protocols sama sa social distancing ug pagsuot og facemask.

Dungan sab sa pagpaubos na sa GCQ ang pagsugod na sa enrollment period alang sa school year 2020-2021 bisan pa man sa dayag nga kabalaka sa mga ginikanan sa kasigurohan sa panglawas sa ilang mga anak

Daghang mga ginikanan ang nabalaka nga mahitabo dinhi sa Pilipinas ang nahitabo sa ubang mga nasud nga niahat pagkompiyansa batok sa COVID-19 hinungdan nga daghan sa ilang mga tinun-an nga bag-ohay pang namalik sa pageskuyla ang nangatakdan.

Ang DepEd dunay kaakohan para sa edukasyon sa kabataang Pilipino, ang Department of Health maoy gitahasan sab sa kaluwasan sa panglawas sa tanan.

Samtang tuod naa gyud kanunay ang peligro aning COVID-19, dili kinahanglang isakripisyo ang kaugmaon sa nasud kun ang kabataan niini karon dili makapadayon sa pagtungha karong tuiga.

Responsibilidad sa gobiyerno nga siguraduhon ang kalamboan ug kalamposan sa nasud.

Mahimo lang kini pinaagi sa pagsuporta sa administrasyon aning maong mga departamentoha ug mandoan sab ang ubang mga ahensiya niini nga suportahan kini ilabi na ang kapolisan ug transportasyon. Dinhi sa Sugbo, may mga nagduhaduha sa desisyong mag GCQ na tungod sa hulga apan naa sab sa ilang hunahuna ang panginabuhian nga nabalda na sulod na sa kapin duha ka buwan.

Busa, gustohon man o dili, bisan pait kini nga tambal, kinahanglang tunlon alang sa kaayohan sa mas kinabag-an. Kinahanglan lang nga magpabilin ang disiplina sa publiko pagsunod sa new normal.