Testing
JAV, BANATI! - Javier Tapulado (Banat) - May 15, 2020 - 12:00am

Tanan gilaay nag-estar sa balay. Gimingaw na sa ilang kanhi naandang negosyo, trabaho ug dapit-lingawlingawan.

Busa, gusto na sila matapos ang kabangis ni Covid-19 nga walay kukaluoyng mibilanggo sa ilang kagawasan. Buwahan, kon hingpit na kining mahanaw, makapadayon na sila pagsumpay sa naputol nilang tagsatagsa ka gimbuhaton.

Hasta mga lider sa lokal ug nasyonal nga pangagamhanan, ang tanan mibati sab niini. Mao bitaw nga wala silay hunong pagpahigayon og virus testing gamit ang COVID-19 testing kits ug swab tests ngadto sa mga dapit, diin nasubay o nasayran nga nasudlan og mga tawong positibo sa maong virus. Buwahan, mapugngan ang kusog nga pagsanay niini.

Usab, dinhi sa Cebu City, ang mga kadagkoan mipasiugda pod og mass testing gamit ang rapid test kits.

Apan nakontrobersiyal kini ug gilalisan. Daghang pangutana sa mga masuhiron nga gilabay ngadto sa mga tigpasiugda nga ambot, makahibulong, nganong wala mahatagig tukmang tubag.

Gumikan niini, si City Administrator Floro Casas ug Cebu City Health Department Head Daisy Villa nag-away-binasolay human makita sa katawhan nga adunay kapalpakan sa ilang pagpahigayog mass testing.

Hinuon, nahilot ra ni Mayor Labella ang maong panagbangi. Ug napugngan ang pagdako sa kalayo.

Ning pagtugsaw sa COVID-19 sa tibuok kalibotan, naukay ang kalinaw nga pamuyo sa katawhan ug gipulihag tumang kalisang. Kada adlaw, may mangatakdan ug mangamatay.

Busa, gipaspasan sa atong gobiyerno ang paghimog swab testing sa mga nahaduol sa napositibo sa COVID-19 ug sa mga gisuspetsahan.

Pinaagi sa testing, nanggawas ang nagkadaiyang kinaiya sa tawo. May nagyawyaw batok sa kagamhanan. May gi-isolate nga miikyas.

May positibo nga naghikog. Pastilan, nasayod kaha sila, nga kining pagpanghasi sa COVID-19, paagi sa Ginoo aron Iya tang testingan kon may luna pa ba Siya sulod sa atong kasingkasing?

Ug ania ang mga unod sa Iyang pagtesting nato: 1) Gihigugma ba nimo ang imong kaaway? 2) Gihigugma ba nimo ang Ginoo labaw sa tanan sa tibuok mong kinabuhi? 3) Gihigugma ba nimo ang imong isig ka ingon sama sa imong kaugalingon?

Kon ang imong tubag ‘Oo’, diin imo ning gimatuod sa buhat, unya kutloon sa COVID-19 imong kinabuhi, may dako ka nang luna sa langit. Perog ‘No’, aw, sayod ka na asa ka paingon.

TESTING
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with