EDITORYAL - Nganong midaghan gihapon

Napulo ka adlaw nalang mapupos na ang giluwatan ‘extension’ sa enhanced community quarantine sa nagkadaiyang mga rehiyon ug probinsya dinhi sa nasud, kini gipatuman human nakita nga padayon gihapon ang pagsaka sa mga kaso sa coronavirus (COVID-19) sa pipila ka mga lugar.

Dinhi sa Sugbo, padayon ang pagsaka sa gidaghanon sa mga tawong nataptan sa maong sakit, apan hasta mga lugar nga nasudlan sa COVID-19 nadugangan man sab.

Sa Cebu City palang, dunay mga barangay sa miaging buwan way bisan usa ka kaso sa maong virus, apan ning bag-o, duna na ug dili lang usa kondili daghan sila.

Tungod niini, makapangutana kita kun naimplimentar ug gituman ba gyud ang ECQ? Lugak ra ba kaayo?

Ang nag-unang kamandoan sa ECQ mao ang stay at home policy, numero uno gyud kini. Apan diha palang duna gihapoy mga wala mopatuo.

Mao nga dili kalikayan nga dunay mga tawong masuko gyud sa ilang mga silingan nga padayong nagmagahi pagtuman sa social distancing, pagsuot og facemask, pagtahod sa curfew, ug labaw sa tanan ang stay at home nga kamandoan.

Wala man gidid-an gyud ang paggawas-gawas sa balay, basta naa lang gyuy quarantine pass ug pagpalit ra gyud sa pagkaon ug tambal ang tuyo sa gawas.

Apan namatikdan nga bisan ang mga regular nga estambay diha sa dalan naa ra gihapon unya duna pay gitangkil nga quarantine passes.

Samtang tinuod nga nimenus ang mga sakyanan sa kadalan human gipahugtan ang pagsita sa dunay mga ECQ passes sa mga motorista nimenus gyud ang mga tawo sa kadalanan.

Apan nganong nidaghan man gihapon kining mga nataptan ug nikatag pa gyud sa ubang mga barangay. Asa kaha ni gikan?

Mas maayo tingaling pangusgan pa sa kapolisan ang pagpatrolya ug pagsita sa mga tawong ilang maabtan sa karsada aning nahibiling napulo ka mga adlaw sa ECQ kay kun magpadayon ang ingon niini modaghan pa ang mataptan ug mas modugay kining ECQ.