May mga tawo man o wala

Dunay kaila nako nga nagkatawang niasoy nga didto kuno sa ilang parokya ang ilang kura nakapalit og gamay ra gud nga luna ug sulod sa maong luna nagtukod kini og balay diin sulod maong balay ang pari naggahin gyud og dapit alang sa iyang personal nga kapilya.

Nikatawa ang parokyano kay ngano man diay ang maong pari magmisa nga mag-inusara?

Nahauknol siya sa dihang giingnan ko siya nga may tawo man o wala ang pari required gyud nga magmisa kada adlaw.

Gani ang pag-ampo sa Divine Office nga ikaw rang usa wala man magpasabot nga ikaw nag-inusara kini tungod kay ang imong giampo dili man nimo personal nga pag-ampo lamang kondili pag-ampo kini sa Simbahang Unibersal.

Nagkadaiya ang gibati sa mga kaparian ning hitaboa.

Gani ang mga manimbahay usab nakasinati man sa dakong kahaw-ang.

Hinuon wakeup call usab kini sa kadaghanan nga mi-take for granted lang sa Santos nga Misa.

Tungod kay buhong kita sa pagsinati niini matag adlaw usahay nakalimot kita sa bili niini. Kun anaa man gani tuod kita sa Misa, nahimong daw wala pud ang atong hunahuna.

Daghan sa mga tawo labina kun dili kauyon sa imong wali ang motawag kanimo ug mohatag pa og mga suggestions aron mamahimong mas monindot pa ang imong mga wali.

Hinuon maayo man kana, apan hinumdomi nga ang Misa dili lang wali kondili dunay laing mga elemento nga nakapahimo niini nga Misa.

Mao ning mga tawo nga buot gyud og walidor nga kusog mokomedya aron sila malingaw.

Apan kun pangutan-on kun unsay ilang napupo, ang ilang tubag nganga!

Duna say uban nga bisan wala na kinahanglana mohimo pud og ila-ila kaha aron mapasulod gyud ang ilang kaugalingong kawsa.