Grabeha na uy!

Grabeha na gyud sa epekto sa pagkuyanap sa Coronavirus Disease (Covid-19) ug bisan unsa na lang ang nasulod sa utok sa atong mga opisyal sa kagamhanan.

Tiaw mo nga ang mga opisyal sa Department of Transportation and Communication (DOTr) nagplano nga did-an na nila nga may moangkas sa mga motorsiklo, sa ato pa ang driver na lang gyud maoy mosakay ug wala nay angkas.

Ang rason kuno kay ang mag-angkas sa motorsiklo dikit gyud kaayo sa driver, ug kon may usa kanila nga natakboyan og Covid-19, aw makapatakod dayon. Ambot og makapatuman ba kaha niini ang mga mananakop.

* * *

Unya, si Mayor Edgar Labella miisyu og Executive Order nga upat ka adlaw na lang ang trabaho sa mga kawani sa City Hall, ug dugangan og usa lang ka oras ang ilang duty kada adlaw.

Kay siyam ra man ka oras ang ilang pagtrabaho sa usa ka adlaw, mahulog nga 36 ka oras ra ang ilang duty sa usa ka semana, ug dili kaabot og 40 sigun sa gilatid sa Civil Service Law. 

Ang resulta niini mao nga alkanse ang gobiyerno og upat ka oras sa matag empliyado kada semana. Kon imong hinuktokan pag-ayo, kay ang kagamhanan sa Dakbayan sa Sugbo may kapin man sa 5,000 ka kawani, nagpasabot nga kada semana maalkanse ang siyudad og kapin sa 20,000 ka oras.

Ang 20,000 ka oras nagkahulogan na kana og 2,500 ka adlaw nga dili matrabahoan ug dako na kaayo ang matrabaho unta sa maong mga kawani.

Awhagon nako si Mayor Labella nga kon himoon niyang upat ka adlaw ang pag-duty sa mga kawani sa Cebu City Hall, kinahanglan nga himoong 10 ka oras ang ilang duty aron 40 ra gihapon ka oras ang ilang duty sa usa ka semana. Dili ba maayo?

* * *

Tinuod, nag-anam na kakuyaw ang kahimtang karon sa katawhan kay dinhi sa Central Visayas, may namatay na man gyud sa Coronavirus Disease. Kini man gani maoy rason sa pag-isyu ni Mayor Labella og kamandoan nga nagsuspenso sa klase sa mga tinun-an.

Nindot ang gihimo sa atong mga opisyal sa kagamhanan. Gikan ni Gobernador Gwen Garcia ug sa mga mayor, sama ni Mandaue City Mayor Jonas Cortes, Talisay City Samsam Gullas, Lapu-Lapu City Mayor Junard Chan ug uban pa.

Apan pahimangno nako sa mga ginikanan nga basin baya o gang inyong mga bata abi kay walay klase, anha magsuroy-suroy sa mga mall.

Likayi ninyo ang pagpasuroy sa inyong mga anak sa mga dapit nga magpundok ang katawhan aron nga makalikay sila sa Covid-19.