Wa kaligo kay ‘naa’ niya!
Agi og pagbatok sa pagkuyanap sa coronavirus sa ilang lugar, ang mayor sa lungsod sa Gen. Luna, Quezon, misagop ug mga lakang aron mapanalipdan ang katawhan sa maong makamatay nga virus. Tungod niini, ginadili na pagtabi-tabi ingon man pagtambong sa bunyag, kasal ug birthday party. Gimandoan usab sa mayor ang mga empleyado nga maligo sa dili pa motambong sa opisina ug nga ireport ngadto kaniya kadtong mga tapulan maligo. Daghan tabian ang mawad-an og kalingawan niining kalakiha. Daghan sab tingale ang morason nga “Naa niya, maong wa siya kaligo”. Madahaaan!
Taralon usab ang panic buyers
Ang kagamhanan sa dakbayan sa Sugbo giingon nga motaral sa hukmanan niadtong mamaligya og mga rubbing alcohol ug face masks sa sobra o mahal kaayo nga presyo labaw sa gitakda sa DTI. Dili ba diay apilon sa pagtaral kadtong mga naghinobra pagpamalit nga sila man ang hinungdan ngano nga nimahal ang rubbing alcohol ug face masks? Sila unta ang angay unahon. Panic buying pa more!
Online na ang pag-ampo
Tungod sa mando sa kagamhanan sa pagdili sa mga pagtapok-tapok lakip na diha sa mga balay-ampoanan, mipatuman usab ang simbahang Katoliko ug pagsuspenso sa mga misa sa kapin 80 ka parokya sa Archdiocese sa Manila. Apan, mahimo gihapon nga mosud-ong sa misa diha sa salida sa TV. Matud pa sa akong higala, mahatagan na gayod og matood hulagway ang paagi sa pag-ampo nga gitudlo sa atong Ginoong Jesus nga nag-ingon, “Sulod sa imong kwarto, panirado ug didto pag-ampo sa imong Amahan nga dili makita”. Uso na gyud ang on-line, bisan sa pag-ampo. Hala no!
Daghan mandar, libog pamensar
Nanawagan si Bise Presidente Leni Robredo sa mga pribado ug publikong buhatan sa pagpatuman sa “work-from-home” scheme sa tuyo nga mapugngan ang pakuyanap sa corona virus. Dili ba maayo unta nga ang tanang kamanduan sa panahon ni’ng maong krisis angayan nga magakikan lang sa Presidente o di ba kaha sa mga health authorities aron malikayan ang pagkalibog sa katawhan? Daghan mandar, makalibog sa pamensar. Onli in da Pilipins!
- Latest
