Panic

Kini ang kasagarang nasinati sa kadaghanan nato karon bisan diin ug bisan asa tungod sa kabangis ni Coronavirus.

Hinuon dili na kini kasagaran kini tungod kay sa atong kasaysayan adunay mga nahitabo nga sama niini. Gani niadtong tuig 1665 nahitabo ang dakong kamatay didto sa London.

Daghan ang nawad-an sa ilang kinabuhi.  Gawas sa coronavirus dunay Third Cholera Pandemic nga nahitabo didto sa India mga tuig 1894.

Dunay Asian Flu Pandemic niadtong 1954. Adunay World War Typhus Pandemic. Dunay Cocotzli nga niatake sa katawhan nga nipatay sa mga Aztecs. Plague of Justinian nga ang hinungdan mao ang mga ilaga nga infected.

Nipatay kini sa mga 40 porsiyento sa katawhan sa Constatinople. Anaa ng AIDS nga nahimong hinungdan pud sa kamatayon sa kadaghanan usab. Niadtong 1918 nahitabo usab ang Flu Pandemic.

Ang numero uno mao usab ang Black Death nga nipatay sa daghanang mga tawo sa Uropa.

Ning atong panahon karon anaa ang Corona nga padayong naghulga sa kadaghanan kanato nga ang sinugdanan nagsukad sa Wuhan China. Ug nihulga sa kadaghanan kanato.

Kadaghanan kanato ang nakugang niini ug gani daghan nato ang buot makalikay niini. Ang mga nasud nihimo og mga lakang sa pagsumpo niini apan hangtud karon wala pa kita makasiguro kun masumpo ba gyud nato kini.

Ang atong mahimo mao tingali ang paglikay sa mga posibleng mahitabo pinaagi sa hustong panghugas sa atong mga kamot ug paglikay sa daghang mga tawo.

Sa atong paghimo niini nahimong at stake usab ang atong mga public gatherings ingon man worship.

Hinuon dinhi sa ato wala pa hinuon nagpadala og kamandoan nga angayang hunungon una ang mga public activities taliwala ning maong krisis.

Apan bisan pa niini daghanan gihapon kanato ang nakasinati og panic.  Nga niresulta sa panic buying ug uban pa.

Gani dunay niingon nako nga katapusan na ba kuno sa kalibutan?

Ang akong tubag ambot lang kay kining mga hitaboa posibleng mahitabo bisan asa ug sa sa bisan unsang paagi.

Ang angay lang gyud natong himoon mao man ang paghupot og kaisog ug paglaum nga mahuman ra gihapon kining maong trahedya.

Imbis mahadlok magtambayayong kita sa pagharong niini.

Inubanan sa pag-ampo ngadto sa Dios, atong hunahunaon nga ang panic dili magdala og kaluwasan natong tanan. Hinunoa, magdala sila kanato og kalaglagan.

Busa angayan kitang maningkamot ug maghunahuna sa kadaghan sa dili pa kita mohimo og mga lakang kay basin unya ang atong mga lakang nahimong hinungdan sa atong kaparotan ug kamatayon tungod sa mga impormasyon nga way hinungdan.