CR sa CITOM sa Ramos napasagdan

Ang Ramos Public Market gipanag-iya sa siyudad.  Kada negosyante nga migamit og puwesto dinhi nagbayad sa City Hall. Hasta mga komprador, kinsa mamalit dinhi, nagbayad sab og buhis sa indirektang paagi.

Wayis ang mga negosyante. Ang bayranan nilang buhis adto na nila ipatong sa matag produkto nga ilang gibaligya. Busa, ang mga konsumidor gyod maoy makabayad kanunay.

Sa laktod, kitang mga mamalitay o konsumidor maoy tag-iya sa gibayad nga buhis sa mga negosyante ngadto sa City Hall. Busa, importante sa usa ka merkado publiko nga aduna gyoy kasilyas nga magamit ang katawhan panahon sa emerhensiyang panginahanglan sa lawas.

Dinhay mga higayon nga human ko makapalit og isda sa Ramos Market mao gyoy itukar sa akong kaihion. Unya, kini ra bang senior citizen na, maglisod tag pugong og dugay. Hinuon, duol ra ang nahimutangan sa kasilyas. Ug dali ra kong nahuwasan sa pagpinugong.

Sa miaging Enero 22, mibalik na pod kog Ramos. Mikaon kog pamahaw sa larangan nga anaa mahimutang sa likod sa merkado.

Lami ang ilang init tinola. Hinungdan, nga nakakaon kog daghan. Ug kay naghinobra, nangita dayon kog CR. Sanglit, walay tarong CR ang maong tindahan, miadto na lang ko sa CR sa CITOM sulod sa merkado.

Pastilang alegreha! Nalipay kong bakante tanang CR. Apan pagliso nako sa faucet sa lababo ug pagpislit ko sa kilid sa enuduro, walay mi-agas. Hasta ilang mga baril, walay sulod. Hain ba ang tubig? Hinuon, alas 8:00 pasado pa kadto sa buntag. Tingale, ang tighakot, wala pa moabot. Apan dili maayo nga praktis. Very unfriendly. Kay dapat, pundohan gyod pirmeg tubig ang sudlanan. Buwahan, di matarantar ang nagdaling gikuyawan.

Ingon ini kalaksot ang hitsura sa CR sa CITOM nga anaa mag-opisina sa Ramos Public Market. Linya sa tubig para sa enuduro ug lababo, guba na. Tubig pundohanan, di pirmeng may pundo. Kaluoy sa mga kliyente nga moanhi aron lukaton ang ilang sakyanang gipangklaman ug gipang-tow. Kay walay limpiyong comfort room nga moabi-abi, oras sa ilang panginahanglan.

Mayor Edgardo ‘Ed’ C. Labella, comfort rooms sa CITOM sa Ramos, hagbay rang napasagdan. Morag babayeng nagkamuritsing, kay wala nay nagmahal. Ato ning paguwapahon pag-usab, Mayor! Kaya, ba?