Nagkabantang nga maniobra
ARANGKADA - Leo Lastimosa (Banat) - October 24, 2019 - 12:00am

Alang sa inilang Sugbuanon nga lapad og kasinatian pagpatuman sa higanteng mga proyekto, imposibleng maumol ang unsolicited proposal sa pagtukod og dul-an P400 milyones nga water system nga nadawat sa usa ka lungsod sa Sugbo.

Matod niya labihan ra kamubo sa 22 ka adlaw—gikan sa pagpasar sa mga konsehal og resolusyon nga nagtugot sa mayor pagputol sa kontrata sa Metro Cebu Water District (MCWD) niadtong Septiyembre 25 karong tuiga hangtod sa pahibawo sa munisipyo sa Swiss Challenge alang sa proyekto niadtong Oktubre 17—sa paghingpit sa technical, financial, environment ug administration requirements.

* * *

Matod niya sa di pa makadawat og unsolicited proposal, ang local government unit (LGU) kinahanglan una nga mopasar ang lokal nga mga magbabalaod og ordinansa nga magtugot sa pagpatuman sa ilang proyekto pinaagi sa Public-Private-Partnership (PPP).

Sa di pa sab mahimo ang Swiss Challenge sa unsolicited proposal, nipuno siya, kinahanglan una nga susihon ang katakos sa pagpatuman sa proyekto sa nisugyot nga kompaniya ug ang kamatinud-anon sa mga pangangkon sa mga aspetong teknikal ug sa panalapi sa proyekto sa di pa madeklarar nga sila ang lehitimo nga original proponent.

* * *

Susama sa nangaging mga transaksiyon kasagaran maabtan og pila ka buwan kon di man tuig. Apan nagduda siya nga di kasarangan ang transaksiyon sa munisipyo nga mahimong manakod sab sa ubang mga lungsod ug dakbayan nga giserbisyohan sa MCWD.

Nga sayon kaayong mahitabo tungod sa kakuwang og oposisyon sa kasagaran sa LGUs.

Bisan way klarong pagtuon ug kasayuran, magyangu-yango ra ang mga konsehal bisan unsa ang isugo sa ilang mga labaw.

* * *

Maong nagduda siya nga dunay mas dakong mantaga nga nagpaluyo ning tanan nga maniobra. Nga naglambigit sa LGUs sa Metro Cebu, Local Water Utilities Administration (LWUA) ug, labaw sa tanan, mas dagkong mga opisyal sa gobyerno ug adunahang mga negosyante nga nagpahipi pa hangtod karon.

Nahugno siya nga nagpagamit sa lipatlipat ang lokal nga mga opisyal nga nagpatuo nga ligdong ug masinugtanon sa balaod.

Bisan nagkaklaro na nga ang tinuod nga katuyoan di ang paghigugma ug pag-alagad sa mga Sugbuanon. Kon dili ang pagpanguwarta nila ug pagtilok sa tanang matiti nga ginansiya kon sila nay magkontrolar sa negosyo sa tubig.

* * *

leolastimosa@gmail.com

METRO CEBU SWISS CHALLENGE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with