Kun nawala na ang pagsalig
MGA LAMAS SA KINABUHI - Fr. Rey Cui (Banat) - October 21, 2019 - 12:00am

Si Oscar Romero dunay bisita ang iyang ngalan Marianela Vilas ang manlalaban alang sa mga kabus nga taga El Salvador. Ning tungora ang maong abogada wala na moanhi alang sa uban. Mianhi siya alang sa iyang kaugalingon. Iyang gisaysay ngadto kang Oscar Romero kung giunsa siya sa pagdagit, paglugos ug pagpanamastamas. Ang maong tingog nga nag-asoy dili pinasikad sa pagdumot ug kalagot. Pabilin kining kalma ug malinawon si Oscar Romero igo lang sa paghilak ug paghilak daw sama sa bata. Nihilak siya taman sa ginhawa ug luyo sa iyang hunahuna anaa ang pagduda ug daghang mga pangutana kun nganong nahitabo man kining mga butanga.

Apan bisan pa niini wala siya mawad-i og pagsalig. Pabilin ang iyang pagtuo ug iyang kining gitiman-an pinaagi sa iyang dugo. Gipatay man siya samtang nagsaulog siya sa Santos nga Misa. Sa pan nga gikonsagrahan sa balaang mga kamot milagbas ang bala sa kamatayon ngadto sa iyang agtang. Lisud tuod kun mahanaw na ang pagsalig. Ang pagsalig nga mahanaw mahulipan man og ka walay paglaum. Ang kawalay paglaum mao man ang maghatag sa tawo og  ka walay kapaingnan. Mamahimong dulom pa sa alkitran ang kinabuhi kun mahanaw na ang paglaum ug pagtuo. Ang Dios tinuod  dili makahatag sa tubag sa daghanan natong mga pangutana apan usa ka butang lang gyud ang siguro sa panahon sa atong  pag-antos ug pagbangotan kuyog siya nato. Ug kapasikaran nahimong sukaranan nga ang pagtuo hunahuna kun dili usa diay ka pakiglambigit.

* * *

Ang dunot sa iyang panit

Duna ‘toy niingon nako nganong niitom kuno ko og samot. Nga sa ato pa diay itom na ko daan. Apan bisan pa niini wala ko maguol nga ako itom kay bisan unsaon ingon ini lang ta gihapon. Gihimong standard sa taga kasadpan ang ilang bulok ingon nga sukaranan ug sumbanan sa tinuod nga kaanyag mao nga kitang mga tabunon ang naningkamot aron panit papution. Apan bisan unsay atong himuon nahimo namang kiwaw hinuon. Ang mensahe mao ni nga angayan lamang nga atong dawaton ug alimahon ang bisan unsa nga nia na nato. Dili na lang nato pangitaon ang bisan unsa nga dili haom nato. Usa kini ka cultural bullying ug kita pud mismo ang nitugot nga kita i-bully kay lagi naningkamot man kita nga sama nila moputi. Hinuon tagsatagsa og kagawasan ang matag tawo. Ang gikinahanglan niini mao ang hustong pagsabot ug panlantaw sa kinabuhi. Nagpasabot kini nga angayan na natong usbon ang atong gayagaya mentality.

Atong gipakagamay ang atong kagikan kay kun buot hunahunaon may ikabuga usab kita sama sa uban. Dili kini delusion of grandeur kay ang delusion of grandeur nagtudlo man nga ang tawo nga naghupot niini tawo nga nagtuo nga siya importante na gyud kaayo sa uban.

Bisan pa man kun dili kita mahimong importante alang sa uban, angayan lamang nga dili pud nato wad-on ang garbo sa bisan unsa nga nia na kanato. Imbes ato kining pulihan ato kining palipangon. Dugang pa ang kinabuhi dili lang mahitungod sa gitawag natong bulok o kaanyag. Mahitungod kini sa bili ug sa imong mahimo alang sa kaayohan sa kadaghanan. Busa ayaw kahadlok kun ugaling ikaw lagumon o tabunon. Hinumdomi dili tanang pution matawag nga maanyag o ang tanang tabunon laksot.

Ang tinuod nga kaambong ug kaanyag anaa sa atong galamhan ug dili lang sa atong bayhon. Kay mag-unsa man tuod kun ang imong lawas nga Coca Cola kun nawong mo abridor?

PAGSALIG
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with