Mibalik sa Mohon
MGA LAMAS SA KINABUHI - Fr. Rey Cui (Banat) - October 18, 2019 - 12:00am

Tungod kang San Pedro Calungsod ug sa pagdapit sa bag-ong kura paroko ako mihimo og balik panaw sa dapit diin ako gikan. Ang parokya ni San Pedro Calungsod sa Mohon, Sogod. Sa maong pagbalik nakita ko ang akong kaugalingon nga mihimo og balik lantaw sa akong kasinatian kanhi sa dihang gihimo pa ang pag-ugmad ning maong parokya. Apan nindot usab balikan ang kasinatian uban sa katawhan nga alang nako mao ang pinakamahinungdanon sa tanan. Gikan sa Mohon niadto ko sa Takay ug didto nakighimamat usab sa akong mga kahigalaan.  Matag sinugdanan dunay katapusan. Ang kamatayon sa usa ka sugilanon maoy sinugdanan sa laing leyenda sa kinabuhing tawhanon. Tinuod mahimong mapupos ang katuigan sa atong mainitong pagbinayloay sa atong kaugalingong kasinatian apan pabiling mamahimong lab-as ang atong tagsa tagsa ka mga handurawan sa atong paghimamatay.  Ang Mohon nga nagpasabot og sukaranan ug timailhan sa usa ka teritoryo dili lamang mahitungod sa teritoryo sa yuta (nga karon gipaningkamotan sa duruha ka mga lungsod nga mao ang Sogod ug Tabuelan nga masulbad), kondili usab sa tagsa tagsa usab ka teritoryo sa atong tawhanong kalambigitan. Wala kini magpasabot nga atong sirhan ang atong kaugalingon gikan sa uban apan dunay mga higayon nga kinahanglan atong atimanon usab ang atong kaugalingong kabaskog gikan sa bisan unsa nga makadaut labina kun maghisgot kita og mga toxic nga tawo.

Kay dili tanang tawo mahimong atong tagdon kay ang uban kanila nag-usik lamang sa atong kabaskog ug panahon. Sama usab sa sugilanon, dili tanan atong handumon kay ang uban kanila trahedya ug ang bisan unsang trahedya kinahanglan ihiklin aron magpabilin kitang anaa sa hustong panghunahuna ug dili sa gubot pa sa lukot nga pakigbisog.

* * *

Ang linog ug uban pang katalagman

Dili pa lang dugay nilinog ang dapit sa kaulohan. Mao nga daghang mga tawo ang nahimong nalisang ining hitaboa. Hinuon ang maayong buhaton mao lang gyud ang pag-ampo ug pag-amping kay bisan unsaon kun kinaiyahan na ang maningil wa na gyud tay mahimo ana!

Timaan kini nga gamhanan gyud ang kinaiyahan. Mao tingali ni ang hinungdan kun nganong ang atong mga katigulangan ang niisip sa kinaiyahan nga Diyos tungod sa gipakitang kapintas niini.

Apan sa laing bahin, ang kinaiyahan nipahinumdom kanato nga diha sa atong kinabuhi nahimo kitang mapagarbuhon sa pagtuo nga atong naangkon ang tanan natong gusto ug mahimo nato ang tanan nga atong himoon. Apan ang lihok sa kinaiyahan nagpahinumdom kanato nga dili nato mahakgom ang tanan ug bisan unsaon pa nato nahimo kitang kabahin sa liyok sa atong kalikupan.

Pahinumdom  usab kini nga mas labing maayo nga atong himoon ang pag-amping sa atong pinuy-anan ug ang pagtahud sa iyang lihok ingon nga gahum nga naghatag og kinabuhi sa matag usa kanato ning kalibutang magkausab usab. Dagasangan kaayo kitang mga tawo.

Gani nagtuo ‘ta nga kita ang tag-iya sa tanan mao nga atong giabusohan ang bisan unsa nga anaa sa atong palibot. Ang resulta mao nga kun maningil na ang kalikupan malisud alang nato ang pagpakabuhi batok kaniya. Sa laing bahin, ang katalagman nipahinumdom nato nga angayan kitang mamahimong andam ug tagana sa bisan unsang mahitabo.

Mao nga angayan kitang magmatngon sa hilabihan gayud dili lang sa mga tawo nga sama nato kondili usab sa mga dili tawo ug mga hayop, mga tanom nga kanato nagpalibot. Ug labaw sa tanan ning atong panahon karon mahinungdanon kaayo ang pagpangandam dili lang kun unsaon pagdagan gikan sa mga katalagman sama sa mga gihimong earthquake drills kondili usab sa mga buildings nga atong gipangtukod kinahanglang makasugakod na sila sa linog.  Mao nga atong ihatag ang atong best sa tanan natong pagahimoon. Sa kauwahian angayan kitang mag-ampo sa tag-iya sa atong kinabuhi ug sa tibuok uniberso. Kun tinuod nato siyang gihigugma buhaton usab unta nato ang pagtahud sa iyang mga hinimo apil na niini ang tawo nga gidagasang usab sa iyang isigkaingon tungod ug alang sa giingon nilang kadaugan ug kaayohan sa tanan.

Mao nga padayon kitang linugon sa mga sayop nga baruganan nga moresulta og sayop nga mga binuhatan. When we strike nature, nature strikes back!

MOHON
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with