Pagpalit og mga sakyanan

Gisaway sa uban ang tinguha ni Mayor Edgardo Labella nga silang mga opisyal sa Dakbayan sa Sugbo mamalit og bag-ong mga sakyanan aron himoon nilang service vehicles.

Ang rason sa mga nanaway mao nga nganong dili man kuno mamalit ang maong mga opisyal og kaugalingon nilang sakyanan aron ang siyudad dili na makagasto og dakong kantidad?

Ang mga opisyal sa kagamhanan, apil ang mga elected officials, mga department ug assistant department heads sa Cebu City Hall, gitugotan nga mahatagan og RATA nga P18,000 kada buwan.

Ang kahulogan niini mao ang Representation Allowance; ug Transportation Allowance. Kon ang usa ka opisyal walay sakyanan nga giisyu kaniya sa kagamhanan, makakobra siya ug transportation allowance nga P9,000.

Apan kon dunay isyu nga sakyanan ang opisyal, ang kobrahon sa maong opisyal mao ra ang representation allowance nga P9,000. Magpili ra ang opisyal kon magpaisyu siya og sakyanan, o mokubra siya og transportation allowance.

Para nako, walay problema kon palitan og mga sakyanan ang mga opisyal sa siyudad, basta dili lang sila mohimo og mga inantigo nga paagi nga ang sakyanan adto ilista sa ilang mga opisina aron nga makadawat gihapon sila og transportation allowance.

* * *

Bahin sa pagtugot nga ang mga sakop sa City Council makakuha og mga consultants, para kanako mahimo gihapon kini nga mahatag kanila, pero tag-usa lang kada konsehal.

Dili malalis nga dili tanang konsehal expert sa tanang isyu, ug nagkinahanglan sila nga abagan og mga consultants aron makapreparar sa ilang mga report. Apan hangyo lang sab nato sa mga konsehal nga basa-basa sab tawon mo sa andamon nga mga resolusyon ug ordinansahon sa inyong mga consultants aron dili mo kataw-anan sa sesyon.

* * *

Nagreklamo ang mga tanod, lupon ug mga barangay garbage workers kay wala na sila makadawat sa City Hall honorarium gikan niadtong buwan sa Hulyo, ang buwan nga miasumier sa katungdanan si Mayor Edgardo Labella.

Ang rason kuno kay wala pa pirmahi sa mayor ang ilang mga dokumento nga gitawag og “Authority to Serve” aron makadawat sila og dugang honorarium gikan sa City Hall.

Kada tanod, sakop sa Lupon ug mga barangay garbage collectors, magdawatan og tag P4,000 kada buwan isip dugang honorarium sa City Hall, apan wala na nila kini madawat sukad niadtong Hulyo.

Ang kapitan sa Barangay San Nicolas-Proper nga si Capt. Clifford Jude Niñal miingon nga wala dawata sa mga opisyal sa City Hall ang iyang lista sa mga tanod ug lupon, kay gustong ilisan ang ubang sakop niini.

Diri hinoon sa among barangay, wala man kini mahitabo, apan apil mi nga wala pa makadawat og City Hall honorarium.