Hinuwaman nga kagawasan

Napupos na ang kinse ka adlaw nga ultimatum ni Presidente Duterte alang sa mga nakagawas gumikan sa Good Conduct Time Allowance GCTA nga mobalik sa jail facility.

Kagahapong adlawa mokapin sa 40 ka mga konbiktado nga gikustodiya sa Criminal Investigation and Detection Group CIDG 7 ang gibalik na sa correctional facility sa Abuyog, Leyte.

Kasagaran kanila mga tigulang na diin dunay 78 anyos nga taga Negros Oriental ug ang 80 anyos nga gikan sa Moalboal.

Luya na kaayo ang ilang lawas kinsa naghambim sa balatian nga unta maatiman na sa ilang pamilya.

Apan gipugos lang intawon nila ang ilang lawas aron makatuman sa panawagan sa presidente nga motahan.

Mahadlok sila nga basin naay dautang mahitabo ugaling mapakyas sa pag surrender.

Atol sa pagdaa kanila sakay sa PNP vehicles padung sa pantalan halos dili na intawon makasaka sa taas nga sakyanan ang uban tungod sa kaluya.

Makaingon ang uban nga angayan lang nga mobalik sila sa bilanggoan kay nakasala man apan kun tan-awon pud nato ang ilang sitwasyon isip tawo luoy pud baya.

Gawas pa nalata na sila sulod sa bilanggoan sa sala nga ilang nahimo busa haum lang pud seguro hatagan sila og kahigayonan nga makauban ang pamilya sa mga kataposang panahon sa ilang kinabuhi.

Kadto ning mga tiguwang na kaayo ug masakiton, pero duna may balaod nga gikinananglan sundon.

Ang mga kabus nga nakapahimulos sa GCTA wa seguro pud to naapil sa kontrobersya kay asa man sila og kwarta?

Ang kagawasan nga ilang gikahinaman natilawan na unta apan hinuwaman lang diay nga gikinahanglan iuli sa bilanggoan.