Asawa ko, paalagaron ko!

Mipagawas og memorandum si Cebu City Mayor Edgar Labella nga paapilon na ang mga asawa sa pipila ka opisyal sa dakbayan sa mga kalihokan sa Parks and Playground Commission labi na sa pag-atiman ug pagpaanindot sa atong mga plaza ug parke.  Nagtamod gayod tingale ang Mayor sa panultihon nga “Daghang kamot, makapagaan sa trabaho”.  Na hala mga opisyales sa barangay, hangyoa usab inyong asawa nga moapil ug mangulo sa pagpanglimpyo sa inyong barangay. Alegre!!!

Pagpili: Magsag-ob o matulog?

Gumikan sa kanihit sa tubig, gidasig karon sa MCWD ang mga lumolupyo sa Lapu-Lapu City ug Cordova nga magtigom og tubig sa oras gikan sa tunga’ng gabii hangtod sa alas 5:00 sa kaadlawon.  Sama ra nga gipapili sa MCWD ang katawhan: MATULOG ka o MAGSAG-OB ka’g tubig.  Sa maong pangutana, sayod na kita kon unsay tubag ni Juan Tamad…MATULOG!!!

Inay sakyan, gipas-an hinuon

Gibakwi na ang kamandoan sa Mactan-Cebu Bridge Management Board (MCBMB) nga did-an ang mga magbisekleta  nga moagi sa taytayan nga nagdugtong sa Lapu-Lapu City ug Mandaue City.

Makaagi na man tuod ang magbisekleta apan dili mahimong magsakay niini ang tag-iya. Maglaum na kita nga makakita og manglabang sa tulay nga magpas-an sa ilang bisekleta. Daghan ang maglingo-lingo sa ulo niining kalakiha!

Fingerprint ra ang kawata

Mga eksperto sa cybersecurity sa China mipasidaan nga ang pagkuha og hulagway sa kaugalingon (selfie) diin ang nag-selfie mogamit sa usa ka nabantog nga senyas sa kamot nga mao ang “scissor hands” nga susama sa “peace” o “Victory” sign mahimong magamit sa mga kriminal aron kawaton ang ‘fingerprint’ sa tawo.   Ang akong kumpare nga nagtrabaho sa abroad kansang kalingawan mao lang ang pagsud-ong sa mga selfie nga hulagway nga ipadala sa iyang asawa, nagkanayon nga: “Sugot lang ko nga kawaton ang finger print basta di lang apilon pagkawat akong asawa.” Hala no!

No retreat, no surrender!

Mipadayag ang Presidente sa iyang pagduda nga mahibalik pa ang Pasig River sa kanhi niyang kalimpyo ug katin-aw nga kahimtang.  Kini gumikan sa iyang obserbasyon sa kadaghan sa mga factory ug mga lumolupyo nga nahimutang ug nagpuyo sa daplin sa maong suba hinungdan sa kahugaw niini.  Kuyaw kon mosunod ang atong mga lokal nga opisyales dinhi sa Sugbo sa gibuhat sa Presidente.  Dili lang pud unta. “No retreat, no surrender”!