Pang-resign mo uy
RENBOR PATROL - Rene U. Borromeo (Banat) - September 17, 2019 - 12:00am

Wala na’y gana ang kadagkoan sa Cebu City Hall clearing team nga mohawan pagbalik sa Alviola Street, ang karsada nga nagsukad sa General Maxilom Avenue ug molapos sa T. Padilla Extension.

Pagkakaron, pwerteng samoka sa maong karsada kay ang mga opisyal sa Barangay Carreta ug Tejero, pareho nga nagmika ug naghinan-aw lang nga ang karsada giabusohan sa ilang mga lumolupyo.

Kining mao nga mga opisyal talawan kaayo mopatuman sa balaod diha sa ilang barangay kay mahadlok nga mangasuko kanila ang mga tawo ug nga dili na sila makadaog kun magpapili pag-usab.

Mao kini ang mga opisyal nga hangol kaayo og katungdanan apan dili maantigo ug wala makasabot kon unsa ang pagpanerbisyo.

Gipadangat nako ni Konsehal Antonio Conahap kining mao nga isyu, apan mahadlok kuno sila kay basin mangasuko ang mga tawo.

Mirespeto man unta ko niining Konsehal Conahap kay “Juris Doctor” lagi kuno siya, sa ato pa nasuhito gyud sa balaod, ug sigurado ko nga nasabtan niya nga ang gihimo sa iyang mga katagi-lumolupyo dakong sayop.

Husto kaayo ang hagit kanila ni Raquel Arce, hepe sa PROBE Team, nga maayo pa og mang-resign mo sa katungdanan kay wala mo’y ayo nga pagka opisyal.

Nakasabot ko nganong nahimangod si Arce sa pagpasagad sa mga opisyal sa kabarangayan kay kapila na ka higayon nga gihawanan nila ang maong dapit, apan ini’g talikod nila, namalik na pud ang mga abusado. Sayonan ka nga ang mga sakyanan, mga motorsiklo giparking pa nga pinababag sa matag daplin sa karsada? Unya daghan pa nga mga tindahan nga anaa gibutang sa karsada? Asa na man moagi ang mga sakyanan?

Unya, nagbagulbol sila nga gibutangan sa CITOM og puthaw nga barandilya ang taliwala sa karsada General Maxilom kay makahatag kuno og risgo sa mga lumolupyo kun may sunog kay dili man dayon makaagi ang mga fire trucks.

Karon, pangutan-on nako ang mga opisyal sa Barangay Tejero ug Carreta, kun may sunog diha sa Alviola Street, makasulod kaha dayon ang mga fire trucks? Nisuway ko pag-agi diha sa miaging semana ug ako gyud nga nasuta nga lisud kaayo ang pag-agi. Kamo unta nga mga opisyal sa barangay, inyong badlongon ang mga nagpabadlong ninyo nga mga lumolupyo.

Nasayod ko nga may masuko kaninyo, ug kini mao ang mga nagpuyo diha sa daplin sa karsada nga maoy miabuso.  Apan sigurado ko nga kun inyong himoon ang inyong katungdanan, mas daghan ang “silent majority” nga naniid ra sa inyong mga lihok.

Ayaw mo pagpatuga-tuga og pangatungdanan sa kagamhanan kon dili man diay kamo makatuman sa inyong tahas.

CLEARING
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with