Anghel dela Guardia
GIKAN SA TSIRMAN - Dr. Jose "Dodong" R. Gullas (Banat) - September 15, 2019 - 12:00am

Kaniadto pa dako ang akong pagtuong tinuod nga dunay mga Anghel dela Guardia. Natawo ko buwan sa Pebrero, ginaingon nga ang langitnon nakong magbalantay mao si Angel Barachiel nga ang kahulogan “God’s Blessing”sa ato pa siya ang anghel sa gasa. Gituohan nga siya maoy tighatud sa atong mga pag-ampo ngadto sa Ginoo ug mao usab ang moyangungo sa mga gasa para nato.

Ning akong panaw ning kalibotanan, kabalo ko nga naa gyud pud diay mga “guardian angels on Earth.” Pwedeng sila ang atong mga higala, minahal sa kinabuhi, kaila, kauban o bisan estranghero nga wala gani ta makaila. Sila katong mga tawo nga nakatabang kanato bisan sa ginagmay nga paagi, nakatabang aron makagaan sa atong kinabuhi, nakatabang nga nakab-ot nato atong mga pangandoy, pasyon ug natuman ang gusto sa atong kasingkasing. Mao nga motuo gyud kong dunay Anghel dela Guardia ang matag-usa nato.

Ang akong pinanggang Mama nga si Mama Pining ang magpabilin nakong Anghel dela Guardia. Dihay usa ka higayon dihang dunay nagpabadlong namong empleyado sa UV accounting department nga ang sala makapataktak kaniya sa trabaho.  Sa adlaw nga pahibaw-on na siya nga siya tangtangon sa trabaho, kalit kining nag AWOL. Nahibaw-an nalang namo nga gidala diay niya ang pipila ka importanteng mga dokumento sa eskuylahan mao nga nagpatabang mi sa NBI.

Milabay pa ang daghang mga semana wala gyud siya namo makit-i pa, nakurat nalang mi sa dihang kalit siyang mibutho sa akong opisina. Naghilak siya nga misulod dala ang mga nawala nga dokumento ug giuli niya kini kanamo.

Matud pa sa maong empleyado mipakita kaniya si Mama Pining ug gisultihan siyang iuli ang mga dokumento. Nahitabo kini niadtong dekada 90 apan si Mama Pining hagbay rang nitaliwan ning kalibotana.

Gani bata pa kaayo kadto nga empleyado aron makaila siya sa akong mama. Mao to nga nakaingon gyud ko nga bisan diay nipahuway na akong Mama padayon siyang nagbantay sa UV.

Pipila ka tuig na ang nakalabay, Septiyembre 8 human sa Santos nga Misa sa Basilica sa pagsaulog sa birthday ni Mama Mary, kaming duha sa akong kapikas nga si Nena padung mi pauli sa Guba diin mi nagpuyo. Grabe ka kusog ang uwan ug dangog kaayo ang dalan mao nga nagduhaduha ko nga mag-drive. Apan samtang nagmaneho nagsige ko og ampo nga makaabot ming luwas sa amo.

Wa damhang nibabag ang sakyanan tungod sa kadangog ug napunta mi kilid gyud sa bung-aw. Swerte na  nga naka-brake ko ug di ang gasolinador kay kun wala pa disgrasya gyud. Ang among magbalantay naa gyud kanamo adtong orasa, mao nga human sa hitabo nag-ampo gyud mi pasalamat.

Sa lain sab nga kasinatian, bisan paman sa kalisdanan ug krisis milampos gyud ta nga mapalambo ang UV pinaagi sa katukoran sa bag-ong mga edipisyo ug pasilidad sa Gullas College of Medicine pipila palang ka tuig ang milabay. Nabuhat namo kini bisan og giimplimentar na ang K-12 program sa DepEd.

Kabalo mo nga daghang mga tunghaan ang nagtihik-tihik sa kwarta tungod niini ug nanaktak sab og mga empleyado, apan kami nipadayon gihapon sa pagtukod og dugang mga pasilidad. Bisan lisod tingaling tuohan apan nakompleto namo kini.

Tingali kapalaran gyud kadtong dunay usa ka tawong akong nakahimamat sa Metro Manila kaniadto nga kaparehas sab nako pangandoy para sa among tagsa-tagsa ka mga medical students nga makabatong og de kalidad nga edukasyon ug maayong pasilidad. Pareho ming duha nga nangandoy pagtukod og ultra-modern medical health and wellness facility nga makita dili lang sa Manila.

Wala gyud mi kalainan kay pareho ming dako og pagmahal sa among mga inahan. Ako siyang giisip nga Anghel dela Guardia gikan sa taas ug uyon ko sa iyang giingong nga kapalaran gyud namong magkaila.

Dihang nangailo na kami sa pagtaliwan sa among mga ginikanan, wa koy laing naa sa hunahuna kondili ang pagpadayon sa UV. Ako dayong nahinumdoman si Dr. Felicidad Reyes sa Philippine Association of Colleges and Universities dihang iya kong giingnan “you can do a lot of things for the University Dodong, but in the end, what is important is to have your academic programs accredited.” Tuod man ako ning gihimo. Dako akong pasalamat sa akong “guardian angel” gikan sa Manila nga nipadayag og kaandam nga tabangan ko nga mapalambo ang academic standards sa tertiary level ug laing “guardian angel” sab ang nitabang para sa Basic Education.

Dako akong pasalamat sa ilang dakong interes nga padayunon ang legasiya  nilang Papa Inting ug Mama Pining nga sa kataposan malaumon akong ilang ikahimuot ang among mga nahimo para sa UV.

Nakahinumdom pa gyud ko pirme kang Papa Inting nga moingon , pag-ampo kanunay sa imong guardian angel aron bantayan kang matulog ug ini’g mata nimo mag-ampo ka usab aron magpasalamat ug giyahan ka sa tibuok adlaw nimong mga ginbuhaton.

Ang akong mga pag-ampo magbilin unta og maayong pagtulon-an sa uban ilabi na sa mga nanginahanglan. Dako kaayong kaayohan para sa tawo kun kita mopaambit sa uban ilabi na sa mga nanginahanglan nungka sa pagtalikod kanila ug magpakahakog.

Alang ni Dodong, ang pagkamanggihatagon mao ang inahan sa tanang kaalam samtang ang pagkamahiubsanon mao ang amahan sa pagpaka-makatawhanon. Timan-i kini,  mas maayo pang magpaubos ug mapasalamaton. Maayo unta nga kitang tanan mahimong “guardian angels” para sa uban.

GUARDIA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with