EDITORYAL - Negosyo sa Bilibid

Ang kontrobersiyal ug gituohang giabusar nga Republic Act No. 10592 o Good Conduct Time Allowance Law daw nakabawos tungod kay daw usa ka tarong ulod ang nadiskubrehan sa nagpadayong imbestigasyon sa Senado bahin niini.

Ang mga opisyales sa Bureau of Corrections gipatawag sa Senado mahitungod sa diriyot nga pagpagawas sa kombiktadong rapist-killer nga si Calawan mayor Antonio Sanchez. Pagtan-aw ra unta kadto kun asa nasipyat sa pagpatuman sa GCTA law ug kun may pagpanuborno ba aron pamub-on ang gidugayan sa silot aron sayong makagawas pinaagi sa maong balaod.

Apan daghan hinuong mga anomalya ang nangabisto nga binuhatan sa mga BuCor officials nga nakigkunsabo sa mga inmates sa ‘money making business’ sa sud.

Dihay 24-oras nga parties, kurapsyon nga naglakip sa pagpakaaron-ingnong nasakit maong kinahanglang magpuyo og dugay sa hospital sa BuCor, dihay mga babayeng mugbo’g lupad nga pasudlon basta makabayad og lagay ang inmates nga nikuha sa serbisyo niini.

Mga kontrabando ipasulod pinaagi sa kunohay mga construction projects himuon diha sa sulod, paggamit sa mga pasilidad sa sulod alang sa mga illegal nga transaksyon sa mga inilang drug lords.

Paghatag og pahalipay sa mga drug lords matag ipatawag sila sa bag-ong hepe sa BuCor, pagkolekta og kwarta sa tanang mga priso aron ihatag ngadto sa bag-ong hepe, kidnapping sa mga karelasyon sa mga drug lords o high profile inmates bugti sa dakong salapi, 24-oras nga sugal ug hasta ang caterers tighatagan sab og suborno aron lang makapadayon sa ilang negosyo pagpakaon didto.

Pipila pa lamang kini sa mga gipangbutyag sa kanhi Bilibid officer-in charge Rafael Ragos nga nadestino didto sugod niadtong Nobiyembre 2012 hangtud Marso 2013.

Sa kalibotan sa mga priso, duna silay kaugalingong patakaran o mga balaod nga sila-sila ray naghimo ug nisunod diin mas bangis ang silot niadtong mga malapason. Ang mokanta, di na maugmaan mao nga nisanay og maayo kining kurapsyon. Ang mando ni Pres. Duterte ilisan ang tanang opisyales sa BuCor apan mahunong na ba gyud ang kurapsyon sa sulod?