Niadtong miaging semana nakadawat ko og text gikan sa atong higala sa media nga si Jess Villarba ug nagpahibawo kanako nga imbitado ko sa kalihokan ni Senador Manny Pacquiao dinhi sa Sugbo niadtong adlaw nga Domingo. Meet and Greet ug pasalamat ang maong kalihokan nga gipahigayon sa Waterfront Hotel sa Barangay Lahug.
Bisan naa koy ginbuhaton sa maong adlaw wala nako kini balibari tungod kay gusto pod nako nga mahimamat sa personal ang Senador sa pamasin nga makahimo og koneksiyon aron makahonghong kaniya sa mga proyekto nga gikinahanglan sa Barangay isip konsehal sa Barangay Quiot ning dakbayan sa Sugbo.
Sigun sa imbitasyon 1:45 sa hapon kinahanglan anaa na sa sulod sa Grand Ballroom ang tanan tungod kay siradoan na kini inig ka alas 2:00 sa hapon.
Sa akong pagabot diha na ang ubang sakop sa Media nga giimbitahan usab diay sa maong kalihokan ug pagkataud-taud naabot si Senador Manny Pacquiao ug ang hamiling kapikas niini nga si Jinky ingon man si Cebu City Mayor Edgardo Labella pero pagkahuman nami nagkakita sa Mayor tungod sa kalayo sa among nahimutangan gani wala gayod kami magkaduol tungod sa kadaghan nga nagpakuha niya og hulagway. Wala nalang ko moapil kay ako nalang gipalabi sa uban nga dili kanunay makaduol sa Mayor.
Giulohan man tuod og Meet and Greet ug Pasalamat ang maong kalihokan apan religious kini tungod kay ang unod niini pag ampo ug pagpaambit sa kasinatian sa pipila ka mga tawo nga gitahasan sa pagpaambit ug ang pinakasentro niini mao ang pagtuki ni Senador Manny Pacquiao sa mga verso sa Bibliya ug ang testimonya sa personal niya nga kinabuhi nga mikaon gayod og dakong oras sa kalihokan.
Giawhag sa Senador ang mga mitambong sa pagbasa sa Bibliya matag adlaw sama sa iyang gihimo. Sa akong tanaw daghan og nakat-onan gikan sa Senador ang mga mitambong ug usa na ko niini.
Wala ko magdahom nga koneksiyon diay sa Ginoo ang akong makuha sa akong pagsanong sa imbitasyon ug dili sa Senador.