Si Franz gyud kaha?

Asa naman ang mga immediate family members ni Franz Sabalones, ang self- confessed drug lord sa Sugbo?

Ni isa wala gyuy nipatim-aw aron unta kuhaon ang lawas ni Sabalones kinsa napatay didto sa kaulohan.

Ang mga operatiba sa Police Regional Office 7 miadto sa mga balwarte sa mga Sabalones aron unta sutaon kun naa pa ba ang mga igsuon ug ginikanan apan napakyas sila kay wala na gyud mopatim-aw bisan kadtong mga babayeng nalambigit kaniya.

Kahibulongan kuno matud sa PNP tungod kay natural sa kadugo nga mobati sa kaguol sa nahitabo sa ilang mahal sa kinabuhi ilabi na kun mamatay kini.

Ang ginikanan o inahan dili gyud makaako nga pasagdan ang anak bisan unsa pa kini ka dautan.

Gani makig-away pa kini basta makita ang anak nga anaa sa kaalautan sama sa kamatayon aron lang makuha ang lawas sa pinanggang anak.

Apan asa naman sila? Ang igsoon ni Franz nga si Vice Mayor Fralz Sabalones wala na usab igkita human kini ni file og leave of absence.

Mitumaw ang katahap kun si Franz ba gyud kaha ang namatay? Ang kapolisan gustong makaseguro pinaagi sa pagpaubos sa scientific process sama sa DNA matching apan kinsa man ang ilang i-match kon wala ang iyang pamilya?

Kini ang nagtangag karon og tanghaga nga walay makatubag hangtod mopatim- aw ang immediate family members. Kun tinuod man ugaling nga si Franz ang namatay, siyaro naman sad kun dili mobati ang mga kabanay kinsa nakapahimulos sa iyang salapi kaniadto.

Hinoon wala kita masayod sa hinungdan sa ilang pagpakahilom basin naa silay rason.

Hangtod dili mahatagan og katin-awan magpabilin gihapon ang mga katahap sama sa nahitaho kang Jaguar Diaz nga nalubong nalang wala gyud maklaro kun siya ba gyud to ang naa sa sulod sa lungon kay wala man to ma proseso sama sa DNA matching.