Sugbuak
LINTUNGANAY - Fred Languido (Banat) - April 11, 2019 - 12:00am

Gibanhaw ni Toledo City Mayor John Henry Osmeña ang tinguha pagbu-ak sa lalawigan.

Atol sa political rally sa iyang partido niadtong miaging Biyernes, matud ni Osmeña nga iyang iduso ang paghimo sa tersero distrito nga usa ka buwag nga probinsiya kun siya modaug isip kongresista karong umaabot nga eleksiyon.

Plano niyang tawgon kini og Occidental Cebu diin ang dakbayan sa Toledo maoy magsilbing capital.

Di bag-o ang maong plano alang ni Osmeña. Usa siya sa nagpaluyo nilang kanhi kongresista Clavel Asas-Martinez, Antonio Yapha, ug Simeon Kintanar niadtong 2005 dihang ilang giduso ang balaudnon didto sa Kongreso nga nagtinguha pagbahin sa Sugbo ngadto sa upat ka buwag nga mga probinsiya.

Sama sa sugyot ni Osmeña buot sab ni Yapha niadto nga himoon ang tersero distrito nga usa ka probinsiya. Si Martinez gusto sab nga ang ika-upat nga distrito mahimong Cebu del Norte ug si Kintanar buot nga ang segundo distrito mahimong Cebu del Sur.

Wala mosaler ang maong plano sa tulo ka mga last termer nga kongresista kaniadto. Kini tungod kay hugtanong gisupak sa mga Sugboanon ang tataw nga kahakog sa gahom sa mga nagpasiugda.

Di sila makadaog sa probinsiya busa buot nilang magtukod og probinsiya sa mga distrito nga ilang kontrolado niadtong higayona.

Ang oposisyon sa maong lakang kaniadto gipangulohan ni kanhi gobernador Gwen Garcia. Gani tungod sa nagkahiusang kawsa pagbabag sa tinguha pagbuak sa Sugbo natawo ang One Cebu Party.

Ang maong partido nga hangtud karon nagpabiling aktibo, maoy landong nga gipasilongan sa tanang kandidato nga mibabag sa Sugbuak niadtong 2007 elections. Human sa piniliay gipalanog sa mayoriya sa mga Sugboanon ang ilang dakong pagsupak pinaagi sa resulta. Ang mga kandidato sa nagpasiugda sa maong lakang giharos og kapildi.

Gihukasan ang mga Martinez sa labing unang higayon sa ilang balwarte. Ang asawa ni Yapha nga si Dr. Estrella Yapha gipildi ni Pablo John Garcia samtang ang segundo distrito ni Kintanar giilog sab ni kanhi gobernador Pablo Garcia.

Nakalimot na ba si Osmeña sa maong kasaysayan? O disperado lang siya nga mamahimong gobernador sa Sugbo?

Pag-angkon ba ni nga di siyang makadaog og eleksiyon sa lalawigan busa maghimo siya og buwag nga probinsiya?  Dili sayon ang pagtukod og bag-ong lalawigan. Nagkinahanglan ni og dakong kantidad aron pagpadagan niini.

Asa man siya mokuha og pundo pagpatukod og Kapitolyo ug ubang mga edipisyo nga gikinahanglan? Wa pay labot niini ang suholan sa mga kawani sa tanang departamento sa usa ka probinsiya aron kini makahatag sa gikinahanglan nga serbisyo.

Nagdamgo si Osmeña o ba kaha bunga ni sa iyang pangidaron. Ang maayo niyang buhaton nga mopahuway nalang siya sa politika.

Ang sama niya nga duna nay igo nga pangidaron ug maglisud na gani sa paglakaw mas maayong mopahuway ug maglulinghayaw.

SUGBUAK
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with