EDITORYAL - Spaghetti wires

Maayo kining ordinansang gipasar sa Konseho sa Dakbayan sa Naga nga magdili na sa mga utility lines nga magkombitay diha sa mga poste kilid sa mga dalan kay dili sila maparehas sa mga dagkong siyudad sa Sugbo nga nagkabulingit sa mga kable.

Ang maong lakang magsiguro nga dili maguba ang maanindot nga mga talan-awon sa maong siyudad nga maoy nawala sa ubang mga dagkong siyudad sama nalang sa mga heritage sites ug mga makasaysayanong mga dapit.

Dinhi lang sa Dakbayan sa Sugbo, daghang mga nindot suroyan dili lang kadtong mga karaang mga edipisyo kondili hasta mga modernong imprastraktura, apan kung kuhaan og hulagway maalihan gyud sa mga nagkombitay nga mga kable sa kuryente, telepono, cable tv lines, ug uban pa.

Maayo lang unta kun maayong pagkahan-ay ug pagkahipos apan wala man. Gani daghan nang mga motorista ang nadisgrasya ug duna pay nangamatay tungod sa nagyungyong nilang mga linya nga nakababag na sa karsada.

Gawas pa niana, ang mga nagkombitay nga mga kable bantayanan kaayo panahon nga adunay katalagman, gawas nga mawala ilang serbisyo kun matumba ang mga poste kuyaw pa makaamong sa uban.

Ang Dakbayan sa Sugbo mas nauna na sa pagpasar og ordinansa kaparehas sa Naga, apan hangtud karon wala pa gyud mahawani gikan sa mga ‘spaghetti wires’ ang kadalanan.

Kini tungod kay uwahi naman kini nahunahunaan sa mga opisyales sa Cebu City. Busa karon, nagkarakara ang mga telecommunications companies kun unsaon nila paghipos ilang mga kable.

Ang Visayan Electric Cooperative naghinayhinay na sab sa paglubong sa mga linya sa ilang kuryente sa mga dagkong karsada sa Cebu City.

Angay nga sundon sa uban pang mga component cities ang gibuhat sa duha ka dakbayan.

Maayo nga sayu-sayo palang may ordinansa na ang Naga samtang dili pa kaayo tantong grabe sama sa sitwasyon sa Cebu City nga ang mga linya sa mga utility companies nagkayagaw lang.