Kabilin

Bisan sa pasidaan sa National Historical Commission of the Philippines (NHCP) sa posibleng asunto nga ilang atubangon, pursigido si Gobernador Hilario Davide III ug ang mga opisyal sa Kapitolyo nga ipadayon ang katukoran sa kontrobersiyal nga Capitol Resource Center.

Gipahibawo na ni Davide nga karong Lunes himuon ang groundbreaking sa 20 ka andana nga edipisyo diha sa Capitol compound nga mobalor og P1.3 bilyones. Si NHCP chairman Rene Escalante mipahinumdom nga wala pay pagtugot gikan nila ang maong proyekto.

Mibahad siya nga posibleng mosangko sa hukmanan ang isyu og pabiling magmagahi ang lalawigan ug ipadayon ang proyekto bisan sa kakuwang og pagtugot sa NHCP.

Ang Kapitolyo hinuon wa gyuy plano nga mangayo og pagtugot sa NHCP. Si Atty. Mark Tolentino nga maoy provincial administrator miingon nga dili sakop sa NHCP ang katukoran sa proyekto busa wa sila kinahanglana nga mangayo og pagtugot.

Sa ka dako sa kantidad sa proyekto, angayan tingali nga sigurohon sa Kapitolyo nga way mga kakulian ang pagpatuman niini.

Unsay mahitabo kun makagasto na ang probinsiya apan moingon ang korte nga husto ang NHCP? Mabawi pa ba ang gasto?

Nganong magpapating man ang mga opisyal sa Kapitolyo inay nga mosubay sa mga lagda sa NHCP. Dili malalis nga ang Kapitolyo usa ka historical landmark. 

Dili ba mahimong paabuton sa mga opisyal sa Kapitolyo nga maplantsa ang problema sa NHCP sa dili pa sugdan ang proyekto?

Sa gihimo sa mga opisyal sa Kapitolyo sa pagkakaron motumaw hinuon ang pagduda nga dunay nagpahipi nga motibo niining ilang pangugat nga kasugdan gyud ang proyekto.

Ug ang di nako masabtan nganong daw sa andam si Davide nga talikdan ang kaligdong sa imahin sa iyang bansagon tungod lang niini.

Sukad sa sinugdan sa iyang administrasyon kanunay niya nga gipasiatab ligdong nga bansagon sa iyang amahan nga si kanhi Chief Justice Hilario Davide Jr. Iya bang isakripisyo ang limpiyo nga imahin sa iyang amahan bugti sa P1.3 bilyones nga proyekto nga napuno sa kontrobersiya?

Makatulog ba siya nga maghuna-huna nga inay maayong legasiya, utang nga P1.5 bilyones na hinuon ang iyang kabilin ug ang posibleng buroka nga isang-at sa NHCP?