Paghipos sa mga makililimo
LINTUNGANAY - Fred P. Languido (Banat) - January 20, 2019 - 12:00am

Gipahibawo sa Department of Social Welfare and Services sa dakbayan sa Sugbo nga ilang gihingusgan ang paglimpiyo sa kadalanan gikan sa mga makililimos isip kabahin sa pagpangandam sa kasaulogan sa Pista Senyor ug Sinulog karong adlawa.

 

Matud sa pangulo sa anti-mendicancy operation nga si Jesusa Berido, buot nilang limpiyo ang kadalanan aron luwas ug hapsay alang sa mga dumuduong niining panahon sa Sinulog. Sukad niadtong Enero 10, miabot na og 22 ka mga tawo ang ilang nahipos, lakip niini ang 12 ka mga hamtong ug 10 ka mga bata.

Kasamtangan silang gipahiluna diha sa Community Scout Youth Guidance Center ug sa Parian Drop-in Center. Giklaro ni Berido nga ang ilang paghipos sa mga makililimos usa ka nagpadayong kampanya ug dili lang panahon sa Sinulog.

Gani matud niya nga sa miaging tuig dunay 1, 476 ka mga street dwellers ang ilang nahipos ug gibalhin sa mga center nga gidumala sa dakbayan. Kun tinuod nga way hunong ang maong kampanya, nganong pabiling naghitak ang mga makililimos sa kadalanan?

Ang tinuod gipasagdan nila ang mga makililimos diha sa kadalanan nga mosanay. Tataw nga buot lang nilang taguan ang tinuod nga hulagway sa dakbayan gikan sa mga bisita.

Human sa Sinulog mobalik na sab sa naandan nilang trabaho ang mga makililimos ug way mga opisyal sa dakbayan nga magpakabana nila hangtud nga dunay laing dakong kalihukan nga kinahanglan silang taguan.

Gikinahanglan ang maluntarong solusyon sa problema ug dili pulos pagpakaaron-ingnon. Akong namatikdan nga kining mga makililimos diha na modagko sa kadalanan. Sa ato pa mao ra ni nga grupo sa mga nagpakilimos nga hipuson kon dunay okasyon ug buhian ra sab inig kahuman.

Angayang seryosohon sa kagamhanan pagpatuman ang programa paghatud nila ngadto sa mga probinsiya diin sila gikan kon wala silay klarong panginabuhi dinhi sa dakbayan.

O ba kaha mohimo og programa ang dakbayan aron sila kahatagan og panginabuhi. Pananglit, inay nga magpakilimos sila sa kadalanan, hatagan sila og trabaho sama sa pagpanilhig sa atong kadalanan o ba kaha paglimpiyo sa mga kanal.

Sa ingon niini masulbad ang problema sa mga makililimos ug malimpiyo pa ang atong palibot.

PISTA SENYOR
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with