Bagutbot

Daghan ang nagbagulbol tungod sa hugot nga siguridad nga gipatuman sa kapolisan diha sa Basilica Minore del Santo Niño.

Apil sa mga nagbagutbot ang mga senior citizen nga mga deboto nga gustong manglaktod og agianan sulod sa basilica.

Dako sab nga isyu ang pagdili sa backpack sulod sa pilgrim center.  Ang mga tiguwang nangreklamo kay kapoy na kuno nga motuyok pa sila aron makasulod sa basilica.

Tungod kay wala gyud mosugot ang mga polis daghan ang nagbagutbot samtang napugos paglinya.

Alang sa mga nagbagulbol ug nagtuo nga tungod sa inyong pangidaron naangkon ninyo ang katungod nga di mosunod sa lagda, hunahunaa pag-ayo unsay ehemplo niini nga inyong gibilin sa mga batan-on.

Wala mo mauwaw mangangkong deboto sa Santo Niño unya bisan sa dyutay nga sakripisyo pagsunod sa mga lagda dili ninyo mahimo?

Kawang ang inyong pagsimba ug debosyon kun bug-at sa inyong dughan ang pagsunod sa mga awtoridad. Wala moy kalainan sa mga Pareseo niadtong panahon ni Kristo, pulos tigpakaaron-ingnon.

* * *

Alang sa mga wala makasabot nganong gidili ang backpack sulod sa pilgrim center. Ang nag-unang hinungdan ini mao ang siguridad. Lisud ug langay ang paghimo sa inspection kun magdala mo og backpack.

Dili mahimo nga yamu-yamoon lang ang pagsusi sa backpack tungod kay posibling dunay mga dautang elemento nga mopahimulos sa higayon ug mohimo og kasamok.

Kun atong sabton og maayo ang gihimo sa kapolisan nga pagdili sa backpack alang ni sa atong kasayon. Dili ba mas sayon ang inyong pagsulod ug dili mo malangay kun wala moy backpack?

Huna-hunaa unsa kalangay ug kasamok ang linya sa ganghaan kun malinga ang mga gwardiya ug kapolisan paghikyad sa mga backpack.

Busa aron dili mo mahasol, labi pa karon nga Sinulog Grand Parade, ayaw pagdala og backpack.

Simple ra gyud ang gipangayo sa kapolisan gikan sa publiko ug ambot nganong lisud alang sa uban ang pagsunod niini.

Ang atong ka subirbiyo bisan sa simple nga mga lagda maoy hinungdan nganong lisud gyud ang paglambo sa atong nasud.

Hangtud nga magpabilin ang kakuwang nato og disiplina sa kaugalingon dili gyud nato makab-ot ang paglambo.