Gustong kuhaon sa in-laws ang custody sa mga bata
Dear Atty. Divine,
Duna koy pangutana labot sa custody sa akong duha ka anak.
Ang akong bana namatay last year. Karon ang akong parents in law mihangyo nako nga adto lang nila ang mga bata kay mas maka-afford daw sila sa pagpaeskwela kanila.
Naa ko nagtrabaho sa gobiyerno apan contractual.
Ang edad sa akong mga anak 6 anyos og 8 anyos. Sa dihang nag-estorya mi sa akong ugangan akong gisultian nga di ko mosugot ila kung gihulga nga ila akong pasakaan og kaso sa korte aron makuha nila ang custody sa mga bata.
Ang akong pangutana kun duna bay legal basis ang akong mga parents in law pagkuha sa custody sa akong mga anak?
Daghang salamat.
Josie
* * *
Dear Josie,
Basi sa Art. 211 sa atong Family Code, kini nagkanayon nga ang inahan ug amahan maoy dunay joint parental authority sa ilang mga anak.
Kun ugaling di sila magkasabot ang desisyon sa amahan ang mopatigbabaw.
Kun patay na ang usa ka ginikanan, ang nahibilin nga parent maoy dunay sole custody ug parental authority sa mga anak.
Ang mga lolo ug lola sa mga bata mamahimo lang nga maka-substitute kun both parents sa mga bata ang nangamatay or unsuitable ang nahibilin niini, like, dunay sakit or dunay problema sa pangisip.
Sa imo nga kaso, wa gyuy legal basis ang pagkuha sa mga bata gikan kanimo kay ang imong kagamay sa income isip contractual employee dili kana ground sa pagtangtang kanimo og katungod sa mga bata. Thanks and God bless.
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina @yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
