Purok Maalagaron

Ang purok maoy kinagamyan nga yuunit sa pang-gobiyerno sa nasud, sakop kini sa sitio nga sakop usab sa barangay diin sakop sa lungsod o siyudad.

Anaa kini karon sa kada barangay, apan murag kutob ra man ang tanan sa pangalan, unsa man ang gibuhat sa mga gitudlo nga purok officials?

Gani kasagaran naay gitukod nga abotanan apan murag waiting sheed ra ka dako.

Apan aniay usa ka purok sa Lungsod sa Cordova nga hilabihan ka han-ay ang ilang pagdala diin detalyado kaayo ang tanan nga masayran kinsa ang mga molupyo ug unsa ang mga background niini lakip na ang kahayopan nila.

Mao kini ang Purok Maalagaron sakop sa Sitio Bankal, Barangay Ibabao, Lungsod sa Cordova.

Aduna silay opisina, simple lang apan hilabihan ka hapsay ug han-ay kaayo ang tanan.

Nakabutang ang record sa tanang mga molupyo sa ilang purok detalyado kaayo.

Tumong niiii nga maila-ila ug masayran ang kalihukan sa mga tawo aron ilang personal nga maestorya kon aduna may mga problema.

Usa sa isyu nga giatubang nila ang cyber pornography diin inanay nilang nahatagan og solusyon.

Sa pakig-alayon sa mga opisyal sa barangay ug sa interfaith community nakabig nila ang katawhan sa paghunong na sa salawayong binuhatan.

Usa sa ilang gihimo ang pagpasabot sa mga tawo nga mas bililhon ang dungog ug ang espirituhanong kabaghoan kay sa yutan-on nga kaibog sa salapi nga maghatud kanila sa kaalautan.

Gisilsil sa alimpatakan nga nabuhi sila kaniadto sa kinaraan nga paagi sama sa pagpangisda, pagpanguma ug uban pa.

Dili lang kutob sa tambag kay gihatagan usab og training ang mga tawo unsaon nila sa pagpalambo sa ilang kinabuhi sa limpyo nga pamaagi lakip na ang organic farming.

Nakita nako nga epektibo kaayo ang sistema nga gipatuman sa purok kay mismo ang mga molupyo na ang nagtambayayong nga mausab ang imahen sa ilang dapit.

Kon nahimo kini sa Purok Maalagaron, walay katarungan nga dili mahimo sa uban.