EDITORYAL - Sugal sa tilaw-tilaw

Wala pa gihapon matagam o maleksyon kining uban bahin sa makadaot nga epekto sa ilegal nga drugas. Bisan nasayod na silang makadaot sa lawas ug posibleng mamahimong hinungdan sa pagkaguba sa ilang pagkatawo ug pamilya sige lang gihapon.

Niadtong nakalabay nga mga adlaw ang City Office for Substance Abuse Prevention (COSAP) pinangulohan ni Gary Lao mibutyag nga adunay 23 ka mga barangay tanod gikan sa mga barangay sa sentro sa siyudad ang nagpositibo sa gihimong surprise drug test.

Ang rekomendasyon sa COSAP mao ang pagtaktak kanila gikan sa serbisyo. Nangahulogang makulban sila og kaldero ug labaw sa tanan gibutang nila sa peligro ang ilang kinabuhi ug mismo ilang pamilya.

 Base sa balaod, legal ang pagtangtang kanila tungod kay walay luna sa gobiyerno ang mga adis-adis ug kabahin sa kampanya ug programa sa Dakbayan sa Sugbo ang paghimong ‘drug –free workplace’ sa mga buhatan niini.

Sukad sa paglingkod ni Pres. Duterte walay hunong ang kampanya kontra ilegal nga drugas. Gani wala ug tuo ang gihimong drug testing sa mga kawani sa gobiyerno aron paglimpyo sa ilang mga buhatan gikan sa mga adis-adis. Gawas pa niana, makalilisang ang wala ug tuo nga mga balita bahin sa mga durugista nga gipangpatay ug nangamatay atol sa mga police anti-illegal drugs operations dinhi sa nasud.

Way pili, hasta polis, ahente, elected officials, negosyante ug bisan mga yamokmok nga mga drug suspects nangadakpan o ba kaha napatay.

Kaning 23 ka mga tanod nagpakita lang nga wala sila magbasa, o makatan-aw sa mga balita o ba kaha wala lang gyud sila mohatag og importansya sa kampanya o sa ilang pamilya kay padayon man silang nigamit og ilegal nga drugas.

Imposible kaayong wala sila masayod nga matag karon ug unya adunay mga kinalit-kalit nga drug testing unya mosugal gyud sila og ‘tilaw-tilaw’ o panagsang paggamit og ilegal nga drugas.

Karon aning sugala, sila maoy pildero.