Pilay advance rental ug deposit

Dear Atty. Divine:

Ang akong iyaan nagpatukod og apartment ug bag-o lang kini nga nahuman.

Ako ang iyang gisangunan isip caretaker niini ug ako sab ang makig-negotiate unya sa mga posibleng moabang.

Ang gusto niya nga inig pirma sa kontrata pabayron og three months advance rental ang moabang ug laing two months nga deposit.

Ang akong pangutana kon sakto ba ning iyang pangayuon nga advance rental ug deposit?

Wa pa man gud ko maka-experience aning magpaabang.

Unsaon man nako pagsiguro nga mapugos gyud sa pagbayad sa monthly rentals ang mangabang? Daghang salamat. — Peter

* * *

Dear Peter:

Kon magpaabang gani ka og apartment for residential purposes, ang balaod nga angayang pagasundon niini mao ang Rent Control Act of 2009.  Kini nga balaod naglimit kon pila lang ang iusbaw nga abangan matag tuig sa lessor ug nagtakda usab kini kon pila ka buwan ang dapat kolektahon sa lessor isip advance rental ug kon pila ka buwan usab ang dapat i-deposit sa nag-abang.

Base sa Section 7 sa Rent Control Act of 2009, kini nagkanayon nga ang mamahimong kolektahon sa lessor isip advance rental gikan sa Lessee usa lang ka buwan.

Kinahanglan sab nga 2-months lang ang pangayuon nga deposit sa lessor gikan sa nag-abang.

Hinuon mga residential unit lang ang covered ning maong balaod.

Busa, way legal nga basihan ang gusto sa imong iyaan nga mokolekta og 3 months advance rental tungod kay 1 month lang ang gitugot sa balaod.

Aron sad pagseguro nga mobayad gyud ang nag-abang sa monthly rental kinahanglan nga magpirmahanay mo og Contract of Lease ug mamahimo sab ikaw nga magpa-issue kaniya og post-dated checks alang sa binuwan nga abang aron imo na lang kining ideposito inig abot sa petsa. Thanks and God bless. — Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.