Panaw sa gugma...
GIKAN SA TSIRMAN - Dr. Jose "Dodong" R. Gullas (Banat) - September 15, 2018 - 12:00am

Dihay usa ka higayon nga nag-estorya mi ni Nena nga mopaambit sa among mga gasa nga nadawat bisan sa pinakagamay nga paagi. Daw may nakadungog sa among giestoryahan, tuig 2007 dihang nakadawat ako og subo kaayong balita, nasunog ang simbahan sa Immaculate Concepcion sa Lungsod sa Oslob. Kinahanglan og dakong kwarta aron matukod kini pagbalik. Sa among tan-aw kon makatabang kami pagpangita og pundo ug kon mapabarog kini pagbalik malipay tingali ang Ginoo ug ang mga Oslobanon.

Human sa pagsaulog sa adlaw nga natawhan ni Nena niadtong Abril 11, 2008, ug samtang nagpreparar kami alang sa paglarga sa UV Chorale ngadto sa Australia aron mosalmot sa World Youth Day celebration, daw giagni ko sa Espiritu Santo ug ni Mama Mary nga dunay buhaton sa Oslob dili pa molarga ang choir.

Nianang mga panahona, ang UV Chorale, nga akong gibuhi pagbalik niadtong 1999, nakadawat na og daghang mga pasidungog ug nakadaog sa mga kompetisyon dinhi ug sa gawas sa nasud. Among nahunahunaan ni Nena, tungod kay gasa man gikan sa Kahitas-an ang mga tingog sa mga miyembro sa Chorale, mas maayong gamiton kini aron makatigom og pundo alang sa pagpatukod og balik sa maong simbahan. Pulong pa ni Nena, sama ra kini nga bayad ngadto sa Ginoo sa gasa sa talento nga gihatag kanila.

Dali namong gipahibalo si anhing Cardinal Vidal bahin niini. Kay suhito sa musika, murag musika kini sa pandungog ni Vidal.  Misugyot siya kanamo nga duolon si Msgr. Joseph Tan aron mahitabo ang konsiyerto.

Paglabay sa pipila ka semana nadayon ug milampos gyud ang konsiyerto nga gisaksihan mismo sa Cardinal. Gawas sa natigom nga salapi gikan sa tiket ug sponsorships, aduna pa gyuy uban nga malumo’g kasingkasing nga mikuot sa ilang pitaka aron motabang. Ang kwarta nakapalit tinuod og mga lansang, GI sheets, sinakong semento apan nakapukaw kini sa Sugboanon bahin sa pagmahal sa atong naandang kultura.

Gihatud namo ang kita ug donasyon ngadto sa Oslob ug midalit og mini-concert ang choir sa mga tawo didto.

Nianang pagkagabii, samtang padung na kami 180-kilometrong biyahe pabalik sa siyudad, mihapit ko sa naugdaw nga simbahan ug nipunit og tipaka sa napaig nga marmol sa altar aron hipuson. Magpahinumdom kini sa gamay nakong tampo bugti sa kadako sa grasyang nahatag sa Kahitas-an.

Tingali agi og pag-ila sa among gamay nga kontribusyon, gimando ni Cardinal Vidal nga ang imahe sa patrona sa Oslob nga Immaculate Conception, ang bugtong imahe nga wala maapil og kasunog, mobisita sa UV Main Campus sa labing unang higayon. Wa ko magdahom niini ug natandog gyud ko ug nakita nako nga mao usab ang gibati sa tibuok unibersidad.

Ang Balaang Inahan usa sa akong mga inspirasyon. Siya maoy tinubdan sa paglaom luyo niining mga kalisod nga akong giagian. Duna akoy gipamati sa lawas apan hugot ug way paglurang ang akong pagsalig sa divine healing ug gani mas nilig-on pa sama sa pilak nga bala.

Dili maayong magdikidiki pagtabang kon adunay mapaambit. Kay ang Ginoo nasayod kon kinsa ang dunay ikahatag—ug Siya dunay paagi pagpadala og mensahe paghimo niini. Buot sa Ginoo nga ang tawo manggihatagon ug mahimong salamin sa Iyang kaayo.

Way kabus nga way mahatag. Mahimong ang uban way materyal nga ikadalit apan ang tanan adunay kasingkasing nga bililhon sa tanan nga paigo nang gasa sa gugma. Busa, bulahan kadtong nihatag.

Pantitik: Paspas nga niirog ang panahon, angkunon ko nga nakalimot nako unsay nahitabo sa Oslob tungod sa kadaghan sa akong ginbuhaton. Usa ka adlaw niana, si  Msgr. Tan, uban ni Mr. Jun Tumulak, Presidente sa Oslob Parish Pastoral Council nakigkita nako ug gisultihan ko nga nakompleto na ang simbahan ug padung na inagurahan ni Cardinal. Nalipay ko sa balita ug nagplano dayon nga moduaw didto sa Disyembre 12.

Apan aduna nasay babag ug pagsuway nga nitumaw ug nameligro pa nga di mahinayon ang among pagduaw sa Oslob anang petsaha. Kay gikinahanglan ko nga operahan sa tuhod sa Oktubre 22, 2009. Tanang indikasyon nagpakita nga lisod gyud nga makalakaw ko pagbalik sa dili pa ang Disyembre 12 bisan og molampos pa ang operasyon.

Tungod niini, midangop ako sa pag-ampo. Ang pag-ampo kanunay nakapahingangha niining ubos nga tumutuo. Pagka- Disyembre 12, makalakaw na ako pag-usab ug wala magkinahanglan og sungkod o walker, gawas pa niana, nakahimo pa gyud ko sa pag-drive uban ni Nena padung sa Oslob. Pag-abot namo didto, daw wala moagi og sunog ang simbahan tungod sa katahom sa pagkatukod niini.  Ang pagpaambit sa may mga malumo og kasingkasing usa ka milagro.

Gibati ako og kalipay nga bisan sa gamay nakong pamaagi pagbalik sa grasyang gihatag kanako nahimo kadtong sinugdanan nga nakaingon nga hingpit nabalik pagtukod ang maong simbahan nga diin ang mga tawo makaampo ug makapasalamat usab sa Kahitas-an.--IBM

 

GUGMA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with