Daghang buslot
LINTUNGANAY - Fred P. Languido (Banat) - September 15, 2018 - 12:00am

Duha na ka mga insidente sa pagpamanhig nga gilambigit ang kapolisan.

Una ang kaso ni konsehal Jessielou Cadungog sa Barangay Tejero ug karong bag-o ang pagbanhig patay sa PDEA agent nga si Von Rian Tecson didto sa Carcar.

Niining duha ka mga kaso pulos patay ang mga pulis nga gipasanginlang nalambigit. Si PO3 Eugene Calumba napusilan sa driver ni Cadungog dihang matud pa misuway ni og banhig niya sa pagtuo nga siya mao ang konsehal.

Samtang si SPO1 Roderick Balili giingong nabaslan sab ni Tecson dihang ila ning gibanhigan.

Ang kadagkuan sa Police Regional Office-7 kusganong nanghimakak sa kalambigitan sa duha ka mga polis. Sa kaso ni Calumba, matud ni Chief Supt. Debold Sinas mao ni ang biktima sa pagpamusil. Gani ilang gipasakaan og kaso si Cadungog ug ang driver niini nga si William Macaslang.

Samtang sa kaso ni Balili, giingong naunay ni sa kauban niyang pulis samtang nagpahigayon og surveillance didto sa Pinamungajan.

Ambot unsang hitaboa, apan daghan ang buslot sa report sa kapolisan nga makapaduda. Una, kinsa ang kaubang pulis nga nakapusil ni Balili? Ikaduha, nganong naabot og pribadong hospital sa Naga kon didto mahitabo ang aksidente sa Pinamungajan?

Pipila lang ni sa mga pangutana nga angayang hatagan og klarong katin-awan sa kapolisan aron mahanaw ang pagduda sa ilang kalambigitan sa maong kaso sa patay.

Usa sa mga angayan nilang buhaton mao nga pagpresentar sa pulis nga nakapusil ug nakaunay ni Balili ug pasakaan og kaso.

Hangtud nga di nila ni mahimo di mahanaw ang pagtahap nga “scripted” ang tanan nilang pamahayag aron pagtabon sa tinuod nga panghitabo.

Importante nga kahatagan sa kapolisan og katin-awan ang daghang mga pangutana aron magpabilin ang pagsalig sa publiko kanila.

Labaw sa tanan dako nilang hagit nga angayang tubagon ug hataga’g kasulbaran ang sunod sunod nga mga kaso sa pagpatay dinhi sa Sugbo.

Hinuon dili ni mahimo sa kapolisan kun kuwang sab og kooperasyon ang mismong mga pamilya sa biktima.

BUSLOT
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with