Imahe sa polis dili na malinis
JAV, BANATI! - Javier Yntig Tapulado (Banat) - August 11, 2018 - 12:00am

Hagbay rang nagkahugaw ang uniporme sa mga polis. Dili ra ning panahon sa administrasyon ni Tatay Digong karon. Kondili, sa nangagi pa!

Kon kanus-a nagsugod pagturok sa atong nasod ang gidiling drugas, labi na sa shabu nga maoy gihimong negosyo sa mga drug syndicates, didto usab mahulog sa lapok ang kalinis sa imahe sa kapolisan.

Sanglit nataligam-an man sa nangaging presidente ang pagluka sa ilegal drugs nga niadtong tungora sahi pa ug ang kasayon ra untang lukahon, napasagdan na lang nila ang pagtubo ug pagkuyanap niini hangtod nga nakagamot  pag-ayo sa kasingkasing  sa mga adik kining komplikadong suliran sa Pilipinas nga ikatandi sa sakit nga kanser, diin wala pa masakpi  ang tukmang tambal nga makaalim.

Didto sa lawod, kon ang mga mananagat makakita’g barungoy, bisa’g usa o duha lang ang manglupad ibabaw sa tubig, sigurado sila nga didto sa ilawom nagpanon ang bagang duot. Paglingkod ni Tatay Digong sa Malakanyang, gibasa dayon niya sa publiko ang listahan sa mga higanteng negosyante, dagkong opisyal sa gobiyerno, mapolitiko man,  polis, o ma-military, kinsa maoy mipadagan sa endless illegal drugs business dinhi sa ato. Pipila lamang kini sa iyang gianunsiyo. Apan ilawom niini, sama sa duruha lang ka nanglupad nga barungoy, may nagpunsisok pang duot sa mga salawayong kapolisan nga gitagoan sa ila kunohay’ng limpyong uniporme, pero gukdonon pud diay sa balaod.

Mao kini ang gikakuyawan sa mga tarong nga citizens. Kay kinsa pa man ang manalipod sa ilang seguridad?  Lalim bay, ang polis gidakop-patay sa polis ra usab? Wa ra bay dag-anan ang patyonon sa polis. Kay kon ang patyonon maoy mapatay sa polis. T.Y. Pero kon ang patyonon maoy makapatay sa polis, dakpon ug pasakaa’g murder! Fair pa ba ang pagpangalagad sa kapolisan?

Basta, imahe sa polis dili na malinis. Tingale, malinis lang kini... kon wala nay makasulod nga illegal drugs sa prisohan, kon ang nakasalang polis dili lang idestino’g laing lugar, kondili,  taktakon pud ug prisohon. Kon ang tanang polis, kinsa involved sa illegal drugs business mohunong na ug mobalik na sa Ginoo. Ug kon ang tibuok nasud mamatud-an nang 100% illegal drugs-free.  Kaya ba, Sir Sinas ug Ma’am Garma?

 

MALINIS
Philstar
  • Latest
Latest