Kampiyon sa demokrasya
Di malalis ang dakong natampo sa mga magtutudlo alang sa kalampusan sa miaging barangay ug Sangguniang Kabataan elections.
Ang atong mga magtutudlo maoy nahimong instrumento aron hapsay ug malampuson nga mapahigayon ang matag piniliay dinhi sa atong nasud.
Sama sa kapolisan ug militar maisip sila nga atong mga bayani ug maoy mga tinuod nga kampiyon sa demokrasya.
Apan subo nga palandungon nga sila nga maoy naghago aron mapatunhay ang piniliay nahiagom sa kalisud aron makuha ang ilang suhol sa kahago.
Nganong hangtud karon lisud alang sa kadagkuan sa Commission on Elections nga mapahapsay ang pagpanghatag sa honorarium sa mga magtutudlo nga miserbisyo sa eleksiyon?
Nganong kinahanglan nga daw sa makililimos nga magpaabot sa taas uyamot nga linya ang mga magtutudlo aron lang makobra ang maguwang lang sa sinsilyo nila nga honorarium?
Labihan intawon kahago sa mga magtutudlo atol sa election unya dugangan pa gyud sa Comelec ang ilang kalisod pagkobra sa ilang hinaguan?
Dili ba mahimo sa Comelec ang pagpasayon sa proseso nga di kinahanglang maghuot sa linya ang mga magtutudlo?
Sa tinud-anay degrading intawn kaayo nga tan-awon ang mga magtutudlo nga maglinya daw sa makililimos.
Nganong di direktang ideposito sa mga account sa magtutudlo ang ilang honorarium aron di na sila kinahanglang maglinya?
Sa ingon niini nga paagi malikayan ang kaguliyang.
Labihan na ka moderno sa panahon nga hapit tanang butang imo nang makuha pinaagi sa usa ka pagpindot, apan ang Comelec nagpabilin pa gihapon sa karaan ug samok nga pamaagi.
Hinaut di na masubli ang ingon niini nga kahasol sa mga magtutudlo sa mosunod nga mga piniliay.
Atong ihatag ang respito nga angayan alang sa atong mga bayani ug tinud-anay nga mga kampiyon sa demokrasya.
* * *
- Latest
