BRT dili mo- complement sa LRT

Lisud mahitabo ang sugyot ni Mayor Tomas Osmeña nga i-integrate ang Bus Rapid Transit (BRT) sa Light Rail Transit (LRT).

Sa sinugdanan, nakita na nga “monster traffic” ang mahimo sa BRT kon ipatuman kini tungod sa kagagmay sa atong mga karsada. Kuhai og tag-usa ngadto sa duha ka lane ang mga karsadang agian sa BRT, ma-imagine nato unsa kahuot sa trapiko.

Naapsan nako ang hunahuna sa mga nagduso niining BRT. Naa sa ilang hunahuna ang pag-ban sa mga pribadong sakyanan, dungan ang pag-ban sa mga PUJ sa mga BRT routes.

Luag tuod. Pero unsaon naman lang ang tagsa-tagsa ka destinasyon sa mga tawo? Pananglit si Karya nga lumolupyo sa Bulacao unya nagtrabaho sa Mabolo nga dili maagian og BRT, pabaklayon na lang nato siya?

Pananglit ako nga naa na ron sa Minglanilla nagpuyo, dili na ko padad-on og sakyanan paingon sa The Freeman kay pasakyon na lang og BRT. Pabaklayon ko gikan sa Jones Avenue paingon sa V. Gullas?

Dili usab ko motuo nga mo-complement ang BRT sa LRT, kay sa sinugdanan, makasamok na daan ang BRT sa mga karsadang agian niini.

Ang giingon sa mga tawo nga nagduso niining BRT nga ang BRT maoy mopasakay sa manganaog gikan sa LRT, dili gyud na mahitabo.

Ang BRT limitado og rota, gikan sa Bulacao subay sa Natalio Bacalso Avenue, liko sa Jones Avenue agi sa Fuente lahus sa Kapitolyo, agi Escario paingon sa Ayala hangtud na sa Talamban.

Motuo ko nga mag-complement ang BRT ug LRT kon adunay BRT nga pasudlon paingon sa Pasil, Sawang Calero, San Nicolas, Ermita ug mga coastal barangays.

Ang mo-complement sa LRT mao ang mga modernong e-jeepneys nga giduso karon sa Duterte administration. Sila ang mosawo sa mga pasahero sa LRT aron mohatod ngadto sa mga interior nga bahin.

Laing mo-complement sa LRT mao ang monorail nga anhi magtuyoktuyok sa city center sa siyudad sa Sugbo. Pero ang BRT mao ra gyud unya’y makasamok sa siyudad.

Ang BRT usab mao unya’y labing mahalon nga proyekto sa labing gamay nga rota. Ang Cebu BRT project molagbas sa 26 kilometros nga gastohan og P18 bilyones, wala pa’y labot sa P5 bilyones kapin nga ipadugang alang sa road right of way para sa terminal ug depot, wala’y road widening.

Ang LRT, sumala sa consortium nga motukod niini, molagbas gikan sa Danao paingon sa Carcar nga adunay gilay-on nga 86.5 kilometro nga gastohan og US$3 bilyones. Adunay subway component sa siyudad.

Ayaw i-barat ang Cebu! Panahon na nga adunay mahalon apan epektibo nga mass transport system!