Kanus-a ta mag-interview Kap?

Misugot na si Kapitan Raquel Avila nga magpa-interview nako kabahin sa pasangil sa iyang uyoan nga konsehal nga siya ug ang iyang bana maoy nag-operate og illegal swertres diha sa Barangay Kamagayan.

Gusto gyud nako siya nga mahinabi niini kay aron siya makatubag sa pasangil ni Konsehal Celestino “Tony” Avila. Walay lipud-lipod si Konsehal Tony Avila, uyoan ni Konsehal Rene Roy Avila nga pag-umangkon ra ni Konsehal Tony, nga iyang mga pag-umangkon maoy nag-finance og illegal swertres sa ilang barangay.

Bisan sa interview ni Konsehal Tony sa Bombo Radyo mga duha ka semana na ang nakalabay, walay lipud-lipod nga gisulti niini sa kahanginan nga ang kapitan maoy operator sa illegal swertres sa Kamagayan. Bisan pa niini, dili pa gyud dayon ko motuo.

May katahap hinoon ko nga mora’g tinuod ang pasangil kay nganong dili man basta-basta nimo nga mapakighinabian si Kapitan Avila bahin niining maong isyu? Unya ang iyang bana nga konsehal, gipaadtoan nako og reporter pero mihukom nga dili motubag niini.

Gusto ni Kapitan Avila nga personal gyud ang among interview, apan mora’g lisud nga magkatagbo ang among mga dalan. Kagahapon, giteksan nako si Kapitan Avila kon moadto na ba ko sa barangay hall, pero wala motubag, busy tingali.

Pagka karon, hatagan gihapon nako og “benefits of the doubt” ang magtiayong Avila nga gipasanginlan nga maoy nag-operate og illegal swertres. Dili pa gyud dayon ko motuo niini hangtud nga ma-interview nako ang kapitan ug matimbang-timbang ang iyang mga tubag.

Sunod nako nga hisgotan mao ang illegal swertres operation sa Barangay Guadalupe ug Barangay Suba, nga matud pa sa akong mga tigpaniid, mga opisyal gihapon ang nag-operate.

* * *

Nindot ang plano ni Mayor Tomas Osmeña nga makig-coordinate siya sa Land Transportation Office (LTO) aron nga dili na irehistro ang mga sakyanan nga dunay pending nga multahanan dinhi sa dakbayan sa Sugbo.

Gikonsulta na nako niini si LTO-7 Regional Director Victor Caindec ug wala siya’y pagsupak niini. Awhagon nako ang mayor nga lihoka dayon, aron makaangkon og katumanan ang imong gitinguha.

* * *

Nalipay ko kaayo kay ang Land Transportation Franchising and Regulatory Board (LTFRB)-7 nga gidumala ni Regional Director Ahmed Cuizon mihimo na gyud og subsob nga operation batok sa mga kulorum nga sakyanan nga gigamit sa pamasahero.

Tan-awa, dili rason nga kuwang ang LTFRB og mga sakop kay anaa ang kapolisan, ilabi na ang PNP Highway Patrol Group nga andam motabang sa pagpahigayon og operation.

Kini maoy gihimo ni LTFRB-6 Regional Director Richie Osmeña didto sa Western Visayas, ug daghan sila og mga dinakpan.