Way matulisok
Tungod sa kontrobersiya sa pagkawagtang sulod sa pila ka oras ni Atty. Sarah Cabrera-Calipayan, nahatagan og lab-as nga sukaranan ang lagda sa kapolisan nga ikadeklarar lang ang usa ka tawo nga “missing” sa 24 ka oras human siya nawagtang.
Kay samtang wa nila ideklarar nga missing si Sarah, gilusad sa mga polis ug ubang ahensiya sa gobiyerno ang hingpit nga imbestigasyon sa pagpangita niya.
Kon gituman pa sa mga polis ang ilang lagda, wa unta maukay ang publiko ug wa unta mahiagom sa higante nga kakiwaw si Sarah ug ang tanang nangita niya.
* * *
Apan dili mabasol si Atty. Jamaal James Calipayan, ang bana ni Sarah. Igo lang siya nga nangita sa iyang asawa sa labing epektibo nga mga paagi nga iyang nahunahunaan. Gisusi niyang trabahoan ni Sarah sa wa pa modangop sa kapolisan, social media ug tradisyonal nga media.
Kon dili pa siya chief of staff ni Kongresista Jonas Cortes sa ika-unom nga distrito sa Sugbo, dili unta magkarakara dayon ang mga polis ug lokal nga mga opisyal, apil na nila ni Cortes ug Cebu City Councilor Dave Tumulak, sa pagpangita ni Sarah.
* * *
Dili sab mabasol si Sarah. Wa gyud siya magsugo ni bisan kinsa, apil na sa iyang bana, sa pagpangita niya. Kinsa may makabuot sa kahasol nga iyang nabatyagan human ni-resign sa trabaho kay wa na makaagwanta sa kadaghan ug kadagko sa palas-unon isip abogada sa Filinvest?
Wa’y makabasol sa iyang kapakyas sa pagpauli kay mahimong mas dako ang katalagman nga mamugna kon nipugos pa siya pagmaneho sa iyang sakyanan bisan nakainom. Bugtong niyang sipyat mao ang kapakyas pag-ila sa kadako sa gugma sa iyang bana.
* * *
Labaw na nga dili mabasol ang kapolisan ug lokal nga mga opisyal. Bisan sa ilang missing persons policy, labi na kay may mga kaso nga pipila ra ka gutlo ang nag-uwang sa kinabuhi ug kamatayon, wa’y makalalis sa panginahanglan pagsusi gilayon sa bisan unsang pakitabang nga ilang madawat.
Napasundayag hinuon nila ang kamapuslanon sa pagtinabangay ug kakugi sa nagkalainlaing units ug bag-ong mga teknolohiya ug kahimanan.
May sukaranan sab hinuon ang panghinaot sa mga magbubuhis: Hinaot nga sama sab kaabtik ang ilang pagtubag sa mga alarma nga maglambigit sa kasarangang mga molupyo.
* * *
- Latest
