Kinsa kaha ang swertres operator?
RENBOR PATROL - Rene U. Borromeo (Banat) - April 17, 2018 - 12:00am

Dili dayon ko motuo sa gisulti ni Kamagayan Konsehal Celestino “Tony” Avila nga ang iyang pag-umangkon nga si Kapitan Raquel Avila ug ang bana niini nga si Konsehal Rene Roy Avila maoy nag-operate og illegal swertres sa ilang dapit.

Gusto nako nga hinabion ang kapitan, hinoon, ang iyang bana nga konsehal sa barangay, midumili sa paghimo’g kumentaryo sa pasangil diha nga gipadad-an nako og reporters aron unta mo-interview kanila.

Kagahapon, nagkateksanay mi ni Kapitan Avila kay gihatagan man ko og contact numbers sa iyang kaubang opisyal sa barangay. Nalibog ko kay gusto kuno sa kapitan nga magka estorya mi personal, pero akong gisukna kon anhaon ba nako siya sa barangay hall, o asa kami mag-interview, dili na motubag.

Gitawag pa nako ang iyang numero apan dili man motubag. Para nako, angay gyud sila nga motubag niining maong pasangil kay dili basta-basta nga pasanginlan ka, ug ang naghimo sa pasangil ila pa gyud nga uyoan nga konsehal gihapon sa barangay.

Kapila ra ma’y pag-ingon nga dili tinuod ang pasangil nga sila mga operator og illegal swertres kon tumo-tumo ra ang pamahayag ni Konsehal Tony Avila.

Apan sagdi lang, hatagan gihapon nato og higayon ang magtiayong Avila nga makatubag. Usbon ko, dili dayon ko motuo nga tinuod ang report hangtud nga dili nako mapaminaw ang ilang tubag.

Apan angay gayud nga motingog sila si Kapitan Avila ug bana nga si Konsehal Avila.

* * *

Nangangkon si Kapitan Eduardo Lauron sa Barangay Carreta nga dili gyud tinuod nga nakadawat siya og P1.4 milyones gikan sa usa ka abogado kaniadtong 2013 aron ibayad sa 98 ka pamilya nga nagpuyo sa pribadong yuta bugti sa pagbiya na nila sa ilang gipuy-an.

Ang pito ka complainants nga silingan ra ni Kapitan Lauron mipasaka og reklamo didto sa Ombudsman kay nakakuha sila og kopya sa Acknowledgment Receipt nga gipirmahan sa kapitan ug ni Atty. Glenn Villariza nga nagmatuod nga ang kapitan midawat og P1,470,000.

Si Villariza maoy nagrepresentar sa tag-iya sa yuta nga nangindahay nga ang mga nagpuyo sa iyang property, mamahawa na unta. Tag P15 mil   ang gipagahin alang sa matag pamilya, apan matud sa pito ka complainants nga wala gayud makadawat ang mga hingtungdan.

Gikiha kuno ni Kapitan Lauron si Villariza kay naghimohimo og dokumento nga wala gayud siya makadawat sa maong kuwarta. Apan matud ni Lauron nga gi-dismiss sa korte ang iyang reklamo. Nalipay kuno si Lauron nga may mikiha kaniya sa Ombudsman aron matin-aw kining maong isyu.

KONSEHAL TONY AVILA
Philstar
Facebook
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with