Cebu City

Gipasidan-an ni Presidente Duterte ang katawhan bahin niining mga mosunod pa unyang mga pagpangatake sa mga terorista bisan asang dapit dinhi sa nasud.

Kon kaniadto ang mga Abu Sayyaf maoy gikaintapan kaayo nga grupo tungod sa ilang kabangis, karon murag pisu nalang sila kon itandi sa gibuhat sa Maute terror gang nga nakig-alyansa gyud sa Islamic State pinaagi ni Abu Sayyaf leader Isnilon Hapilon.

Ang Abu Sayyaf nabantog kaniadto sa pagpamunggot og ulo sa ilang mga biktima, apan ang ilaha klaro kaayong pangwarta ug dili idolohiya o radikalismo sa Islam.

Ilaha lang gigamit nga takoban ang ilang pagtuo sa Islam apan pagkatinuod pangwarta gikan sa ransom ang ilang tumong. Sa laktod, ordinaryo ra silang kriminal nga kidnap for ransom nga brutal ang estilo.

Apan ning bag-o lang, nausab si Hapilon kinsa giingong edukado didto sa Middle East.

Unsa may nakaingon nga murag gitalikdan niya ang milyones pesos nga kitaon niya sa naandang grupo ug iyang gisugal iyang seguridad kay mibiya siya sa Sulu aron adto mangulo sa mainland Mindanao?

Adunay mga balita nga nag-ingong gipadad-an og kwarta sa ISIS ang grupo sa ISIS dinhi sa Southeast Asia, apan di kadto kwarta para niya kondili para sa ilang operasyon. Basin gahom?

Kay siya gud kuno ang giisip nga Emir sa IS caliphate dinhi sa Southeast Asia. Apan ang maong gahom wala mosalbar kaniya gikan sa kamatayon kondili nahimo hinuon kining magnet sa pwersa sa gobiyerno.

Kuli na kaayong mausab pa kini nga matang sa pag-atake sa mga terorista kay siguro gyud nga naleksyon na sila.

Apan si Duterte mi-level up dayon sa iyang pasidaan human sa maong gubat, siya miawhag sa katawhan nga magbantay niining gitawag og “lone wolf” attacks nga himuon sa usa ra ka tawo nga gustong magsabwag og kalisang ug kasakit sa uban pinaagi sa pagpangatake.

Didto sa Uropa, Canada ug sa US nauso kini didto, mga tawong way direktang koneksyon sa ISIS apan misimpatiya sa kawsa sa mga terorista. Lisud silang mamatikdan kay wa silay grupo ug ordinary ra kaayo, apan sagad kanila may gikumkom nga kalagot sa mga naa sa otoridad tungod sa nagkalainlaing mga rason.

Kinahanglan gyud nga buhaton sa gobiyernong Duterte ang tanan aron nga ang nahitabo sa Marawi City dili magbunga og mas daghang inhustisya nga makapaaligutgot sa mga balatian sa mga naapektahan sa maong krisis kon gusto niyang magmalinawon ang iyang termino.