EDITORYAL – Political will ra gyud

Nisaad ang militar nga ilang mabuntog ang Abu Sayyaf tulo ka buwan gikan karon. Ang Abu Sayyaf naglihok dili lang sa Jolo ug Sulu kondili hasta sa pipila ka bahin sa mainland Mindanao nga dunay lugak nga seguridad.

Kun padaghanay lang og tropa, mas daghan gyud ang militar ilabi na sa lapas na 10 mil  karon ka mga sundalo apil na ang tanang assets sa air force ug navy nga gipadala sa gobiyerno sa mga lugar nga naglihok ang Abu Sayyaf.

Sa ato pa, kung pwersahay lang daw buling lang sa kuko ang mga bandido kun itandi sa kumingking sa AFP.  Apan bisan pa niini padayon sa ilang terorismo ang grupo dili lang sa Mindanao, hasta sa kadagatan sa Malaysia ug Indonesia.

Bisan lupig pa sa tapad, adunay dakong bentaha ang ASG kontra sa gobiyerno.  Sila maoy taga diha, nasuhito sila sa mga kalasangan sa lugar ug labaw sa tanan daghan silang mga kababayan nga mosimpatiya kanila bisan pa man sa ilang kadaotan.

Sa panahon pa ni Pres. Fidel V. Ramos nagsugod ang Abu Sayyaf, sukad kaniadto nakigkombate kanila ang militar apan hangtud aktibo pa gihapon ang ASG.

Apan napakyas ang militar sa ilang misyon, kini tungod kay kuwang ang political will sa mga nangaging mga lider sa nasud.

Ang political will mao ang paghingusog dili lang sa mga pulong kondili apilon gyud ang buhat, suporta, pagbubo og pundo dili alang sa militar kondili alang sa mga nagpuyo sa maong mga probinsya.

Paspasan ang pagtukod og daghang imprastraktura,  pangusgan ang edukasyon, hatagan og panginabuhian,  pangusgan ang komunikasyon sa nasudnong kagamhanan ug sa lokal nga pangagamhanan,  pagsigurong dunay batakang serbisyo publiko ug uban pa.

Sama sa problema sa rebelyon sa mga Muslim sa Mindanao, kinahanglan unang buntogon ang kakabus sa mga taga Mindanao. Way laing makabuntog sa Abu Sayyaf kondili ang political will ra gyud sa gobiyerno.