Road rage
SAKSAK SINAGOL - Lucky P. Malicay (Banat) - March 24, 2017 - 12:00am

Sa kadaghan sa kaso sa road rage sa nasud sukad pa kaniadto, mura’g wala pa gayud maleksiyon ang kinabag-an sa mga motorista. Halos matag adlaw na kita makadungog og mga taho mahitungod sa mga panagbingkil sa mga motorista mugna niining walay pagsinabtanay sa karsada.

Kasagaran sa mga insidente sa road rage adunay hinagiban ang malambigit. Kun dili man armas, kutsilyo, baseball bat o bato, bisan unsa na lang ang gamiton sa isig ka habig. Kini aron lang makalapdos sa ilang gikabingkil.

Sagad usab sa mga nalambigit sa mga road rage incidents mga adunahan, ug nga kun mobuto na gani kining maong klase sa insidente, adto masentro ang konsentrasyon sa publiko niadtong prominente nga mga personalidad.

Kini gumikan sa rason nga kasagaran sa mga adunahan magtiner gayud og mga hinagiban sa ilang sakyanan, mao kana nga kun moulbo na gani ang panagbingkil sa kadalanan, dayon lang og kuha sa hinagiban sa dihang mobukal na ang dugo.

Sama niining labing ulahing insidente sa road rage nga gikalambigitan sa anak sa usa sa mga prominente nga pamilya sa Sugbo. Nakaangkon og mga samad ang usa ka nurse sa dihang giingong gipusil kini sa anak sa usa ka adunahan dinhi atol sa ilang panagbingkil sa karsada.

Maayo na lang kay dili seryoso nga samad ang nahiaguman sa maong nurse. Mga samad sa paa ug tuhod lang ang iyang naangkon. Kay kun naintimano pa ang maong biktima, delikado kun unsa nay nahitabo niini karon.

Samtang nagpaalim karon ang biktima sa ospital, nagtingkagol usab sa prisohan ang suspek kinsa nag-atubang karon og mga kaso. Usa na niini mao ang frustrated homicide. Hinuon, expected nga makagawas ra gihapon kini sa prisohan kay bailable man ang maong mga kaso.

Hinuon dakong leksiyon sa mga motorista kining bag-o nga insidente sa road rage, nga kinahanglan dili ipaagi sa init sa ulo ang unsa nga dili pagkasinabot sa karsada, kay dili gayud magsilbi kun ipaagi ang solusyon sa pagbunot sa hinagiban.

SAKSAK SINAGOL
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with