Dulom nga klima sa negosyo

Daghan sa mga Sugboanon ang nagtuo nga kining dakong gubot karon tali sa kagamhanan sa dakbayan sa Sugbo ug pipila ka establisemento dili maayong tilimad-on sa relasyon sa City Hall ug sa sektor sa mga magpapatigayon sa siyudad.

Kay basin unya kun mokakak ang mga gustong mamumuhonan tungod niining maong problema. Kun magkadako kining maong kaguliyang, kuyaw nga wala na unyay mosugal nga mga negosyante pagbubo og puhonan.

Siguro angay nga hunahunaon sa mga opisyales sa siyudad nga dehado gayud ang dakbayan kun magpadayon kining maong problema. Kay kinsa pa man ang ganahan nga magnegosyo sa siyudad kun dulom ang klima sa pamatigayon niini?

Siguro ang maayong buhaton ni Mayor Tomas Osmeña mao ang pagpakigsabot uban sa mga opisyal sa mga negosyo nga iyang gigukod karon. Kini kun gusto gayud siyang masulbad kining maong problema sa daling panahon.

Ang problema usab sa kampo ni Osmeña mao nga wala gyuy nakatambag kaniya nga ipaagi sa diplomasiya ang iyang pag-deal sa maong problema uban sa mga establisemento nga iyang giakusahan nga nanikas sa ilang operasyon sa dakbayan.

Mao nang daghan na hinuon ang nakamatikod nga iyang gipersonal kadtong pipila ka negosyante, ilabina niadtong nakapalit ug dagkong lote diha sa South Road Properties nga gusto ni Osmeña nga ibaliwala tungod kay alkanse kuno ang siyudad.

Sa akong tan-aw, dili gayud mosaler ang kanunay nga paghot ni Osmeña sa mga establisemento nga iyang giakusahan nga nanikas. Angay unta niyang buhaton mao ang pagdangop sa legal nga proseso dili ang sige’ng panganti nga iya silang palayason gikan sa dakbayan.

Insakto ang warning ni Presidential Assistant for the Visayas Michael Dino nga naghatag lamang og maot nga imahe sa dakbayan kining sige nga paggukod sa City Hall sa pipila ka negosyo dinhi. Basin kon yam-iran na hinuon sa mga mamumuhonan ang siyudad ug adto na sila mobubo sa mas maamigohon nga lugar.