Mother Teresa

Karong adlawa, opisyal nga ibayaw sa Simbahang Katoliko pinaagi ni Pope Francis didto sa Vatican City sa Roma, si Blessed Mother Teresa sa Calcutta.

Gipahibawo ni Pope Francis ang canonization ni Blessed Mother Teresa niadtong Marso 15 sa "ordinary public consistory" kon panagtigom sa Santo Papa, cardinals ug promoters sa causes of sainthood.

Si Mother Teresa naila nga "living saint" sanglit saksi ang tibuok kalibutan sa atong henerasyon karon sa iyang mga buhat sa kaluoy alang sa mga masakiton, himalatyon, sa labing kabus sa mga kabus, sa mga bata nga gibiyaan, sa mga sanglahon ug sa mas nagkinahanglan og tabang. 

Albanians ang ginikanan ni Blessed Mother Teresa nga mga katoliko.  Natawo siya niadtong Agusto 26, 1910 sa pangalan nga Anjezë Gonxhe Bojaxhiu.

Ang Gonxhe nagpasabot og putot sa buwak. Sa batang edad nga 18 anyos nibiya siya sa iyang pamilya aron tumanon ang gitinguha sa iyang kasingkasing nga mao ang pagserbisyo sa mas nagkinahanglan, ilabi na sa mga kabus. Nahimo siyang madre sa kongregasyon sa Sister of Loreto. Nahimo siyang citizen sa India niadtong 1947 ug natukod ang Missionaries of Charity didto sa Calcutta nga karon Kolkata, India niadtong 1950.

Gawas sa titulo nga "living saint" giila usab siya nga "saint of the gutter" tungod sa iyang dakong gugma alang sa mga kabus, biniyaan ug sa mga yanong tawo.

Niadtong 1979, gihatagan siya sa Nobel Peace Prize nga pasidungog ug daghan pa nga kalibutanong pasidungog tungod sa iyang pagpalambo sa kalinaw ug pag-atiman sa mga nagmasakiton ug sa mas labing nagkinahanglan sa bisan asang dapit sa kalibutan.

Namatay si Mother Teresa sa edad nga 87 anyos niadtong Septiyembre 5, 1997 didto sa Kolkata, India. Human sa iyang kamatayon gipasugdan dayon ni anhing Pope John Paul II, nga karon mao na si St. Pope John Paul II, ang pagproseso sa canonization ni Mother Teresa aron opisyal nga ilhong santo.

Ubos sa lagda sa Simbahang Katoliko, dunay upat ka proseso nga subayon sa pag-ila sa usa ka santo.

Una, masugdan lang ang pagsusi sa kinabuhi sa usa ka posibleng kandidato sa pagka-santo lima ka tuig human sa iyang kamatayon. Usa ka obispo ang sangonan sa pagsusi sa kinabuhi sa maong kandidato. Kun mopasar sa pasiunang pakisusi, hatagan siya sa Vatican sa titulo nga "Servant of God."

Ikaduha, usa ka opisyal sa Simbahang Katoliko isip advocate sa maong kandidato ang mosusi sa iyang mga bayanihong mithi. Pagkahuman sa documentation iduso kini ngadto sa Congregation for the Causes of Saints. Hatagan siya sa titulo nga "Venerable."

Ikatulo mao ang beatification. Apan matawag lang nga beato ang usa ka kandidato kun makapakita siya og usa ka milagro. Ang ika-upat mao ang canonization, kon ang pagbayaw kaniya isip Santo. Nagkinahanglan na usab kini og laing milagro. Espesyal ang sitwasyon ni Mother Teresa. Human sa iyang kamatayon gipasusi dayon ni St. Pope John Paul the second ang iyang kinabuhi.

Ang unang milagro nga gihimo ni Mother Teresa mao ang pag-ayo sa Indian nga babaye kansang brain tumors hingpit nga nawala.  Ang iyang ikaduhang milagro gipakita ngadto sa usa ka Brazilian nga lalaki kansang multiple brain tumors nawala usab. Ang canonization ni Blessed Mother Teresa karong adlawa gitakdo sa gabii sa ika-19 ka tuig nga kasumaran sa iyang kamatayon. Ang Septiyembre 4, gi-establisar usab sa Vatican kaniadto nga pagtapos sa Year of Mercy, alang sa mga tawo nga dunay pilgrimage sa ilang mga buhat sa kaluoy.