Kalbaryo sa K to 12 ni PNoy

Unang adlaw karon sa klase ilabi na sa mga pampubliko nga tunghaan, apan andam na ba gyud kaha ang tanan sa pagsugod niining tuig tingtungha?

Niadtong nakalabay nga semana pa gipahigayon ang Brigada Eskwela aron mahan-ay ang tanan inigsugod sa klase karong adlawa ug dili na mahasol pa ang mga tinun-an, ug labaw sa tanan, masugdan dayon ang klase.

Apan karong adlawa usab makita ang katag sa pagsugod na sa senior high school diin admitido ang Department of Education nga daghan pa ang kulang sama na lang sa mga classrooms nga gamiton sa grade 11. Sa lalawigan sa Sugbo, adunay mokapin sa usa ka libo ka classrooms ang gipatukod alang sa senior high school apan 371 pa lang ang nahuman ug magamit karong tuiga.

Aron masolusyonan ang problema, ipatuman ang double shifting sa klase sa junior high school o lower grade school aron magamit ang ilang mga classrooms sa grade 11.

Naproblema usab ang mga magtutudlo tungod kay sila pa ang mogasto sa pagpa-photocopy sa materyales nga ilang gamiton sa pagtudlo sa mga tinun-an.

Kini unta ang gitan-aw sa mga hingtungdan nga ahensya sa wala pa nila hingpit ipatuman ang K to 12 program. Mahimo man unta nga iangan- angan lang una ang pagpatuman niini hangtod nga maandam na sa hingpit ang programa.

Hinoon naanad naman kita nga magmantinel lang bisan niadto nga wala pa ang K-12 program. Kun si Education Secretary Armin Luistro ang pasultihon kini ang legacy sa Aquino administration.

Nindot lagi unta kun giuna nila sa pagsulbad ang naandan nga problema sa sistema sa edukasyon apan wala kini nila buhata. Ang K to 12 program ang dili makalimtan nga legacy ni PNoy tungod sa dugang kalbaryo nga gipapas-an niini sa mga kabus nga tinun-an nga mosubay sa tul-id apan tunokon nga dalan.