911 ni Tommy O
ARANGKADA - Leo Lastimosa (Banat) - June 8, 2016 - 12:00am

Inigbalik niya sa Cebu City Hall human sa unom ka tuig nga haw-ang ug timaan sa determinado nga paningkamot sa pag-una pagtagbaw sa labing batakan nga mga panginahanglan sa mga Sugbuanon, si Mayor-elect Tommy Osmeña molusad og duha ka bag-ong programa:

Pag-abli sa hotline nga 911 aron sa pagdawat sa tanang problema ug pakitabang sa katawhan uban ang garantiya nga maatiman silang tanan sa labing dali nga panahon; ug

Paghatag og maintenance nga tambal sa tanang sakit apil nang insulin sa diabetes di lang pinaagi sa health centers kun dili i-apud-apod sa kabalayan mismo sa tanang kabos nga pasyente nga nagkinahanglan.

* * *

Atol sa Arangkada sa DYAB Abante Pa, Bisaya!, gipasabot ni Osmeña nga sa di pa siya mag-umol og dagkong mga plano ug mangandoy og higanteng mga proyekto alang sa Dakbayan sa Sugbo ipatugkad ang iyang pamunoan sa batakang kapuslanan sa gobiyerno: Ang interes sa katawhan maoy palabihon ug ang panginahanglan sa mga kabos maoy unahon.

Subling gisaway ni Osmeña ang pamunoan ni suspended Mayor Mike Rama nga iyang gipasanginlan nga igo lang nibuhong sa mga panginahanglan sa alyadong mga kapitan sa kabaranggayan apan nihikaw sa batakang mga benepisyo sa mga molupyo. Nipasalig sab nga sa di pa ipatuman ang daghan niyang giplanong mga proyekto, konsultahon niya ang nagkalainlaing sektor sa katilingban.

* * *

Hatagan ni Osmeña si Cebu City Councilor Mary Ann Delos Santos sa tanang kahigayonan pagtiwas pagtukod ug pagduma sa bag-ong Cebu City Medical Center (CCMC). Samtang ganahan untang serhan ang CCMC moduko siya sa awhag sa katawhan nga ipabilin ang ospital.

Nipasidaan hinuon si Osmeña nga kun magpabilin ang kahiwian sa CCMC, kun magpadayon ang mga palusot sa kurakot nga mga opisyal ug mga kawani nga nanggungis ug nakagamot na sa tambalanan, ipatuman ang alternatibo niyang plano: Ipasakop ang kabos nga mga molupyo sa Philippine Health Insurance Corporation (PhilHealth) uban ang mas dakong premium aron makapahimus og mas daghang benepisyo.

* * *

Gipahibawo sang Osmeña nga di na madayon pagtukod ang ikaduhang South Road Properties (SRP 2). Nga iyang gisaad sa niaging kampanya ubos sa kundisyon nga padag-on ang tibuok niyang slate sa Bando Osmeña Pundok Kauswagan (BOPK).

Kun nagpabilin pa unta ang mayoriya sa BOPK sa Cebu City Council, masaligon si Osmeña nga mahingpit niyang SRP 2 sud lang sa unom ka tuig. Bisan naabtan og 20 ka tuig sa pagtukod sa orihinal nga SRP, masaligon siyang mas daling makumbinser ang nasudnong gobiyerno kun way problema sa City Council. Kay Team Rama na may magdominar sa konseho, nitataw si Osmeña  nga iwaling ang iyang mga paningkamot pagpalambo sa Sugbo ug sa mga Sugbuanon sa mga aspeto nga di masabotahe sa iyang politikanhon nga mga kaatbang.

  leo_lastimosa@abs-cbn.com

10TH INFANTRY DIVISION ARMED FORCES EASTERN MINDANAO COMMAND ARNOLD ONGACHEN GOVERNOR GENEROSO NEW PEOPLES ARMY
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with