Nidaghan ang patay Pormal

Pormal na nga gitak-opan ang pag-obserbar sa Fire Prevention Month 2016 kaniadtong Marso 30 diin ang nahimong pinasidunggang dinapit mao si kanhi Mayor Tomas Osmeña.

Gihatagan og pasidungog ang mga mananaog sa lainlaing contest sama sa drawing, poster making ug essay writing nga gisalmotan sa mga estudyante lukop Central Visayas.

Lakip sa gihatagan og pasidungog mao ang mga fire volunteers sa Taiheyo Cement sa San Fernando ug Barangay Guadalupe kay sila ang nirepresentar sa Region 7 sa gipahigayon nga National Fire Olympics nga gihimo didto sa kaulohan.

Nagmalampuson ang tanang programa nga gihan-ay sa kabomberohan atol sa Fire Prevention Month. Gani nikunhod ang insidente sa sunog sa buwan sa Marso karong tuiga, kun itandi kini sa miaging tuig.

Ang kahibawo ug kaalam sa mga fire safety sa publiko dako kaayo og ikatampo sa pagkunhod sa fire incidents dinhi sa Sugbo ug sa mga nagkalainlaing lugar dinhi sa Central Visayas.

Apan ang nakaparat kay mas daghan ang casualty kun itandi sa sama nga quarter sa niaging tuig. Siguro nagkinahanglan pa kita og subsob nga pag-implementar sa fire prevention programs sa atong buhatan ug aron makab-ot nato sa hingpit ang pagtiurok sa mga fire incidents.

Tinuod nahuman na ang atong pag-obserbar sa Fire Prevention Month, apan wala kini magpasabot nga loagan na namo ang among kampanya alang sa fire prevention.

Kun inyong naobserbaran, grabe na kaayo ang kainit nga atong nasinati, ug matud pa sa PAGASA mas mograbe pa kini sa umaabot nga mga adlaw. Busa hangyo namo sa publiko nga sa kanunay magmatngon unta kita ug magpakabana aron hingpit kitang luwas sa sunog.

Sa kataposan, isip highlight sa pagtak-op sa Fire Prevention Month, gi-launch na ang all female firefighting crew dinhi sa Sugbo ug gitawag sila og "Berang Bisdak" diin kapin 40 ka babayeng fire personnel ang naglangkob niini.

Ayaw kamo kahibulong nga makakita na unya kamo og mga babaye nga bombero nga makigkombati sa sunog ug mohimo sa search and rescue operations.