Kalbaryo sa IEC

IEC Pavilion—Mas dugay kay sa naandan nga nangabot ang mga delegado sa 51st International Eucharistic Congress (IEC) dinhi alang sa kataposang adlaw sa ilang sesyon. Nangagpas ang mga boluntaryo ug kapolisan nga nag-atang sa mga ganghaan nga dugay’ng nakamata ang mga delegado kay gikapoy human sa duha ka sunudsunod nga adlaw nilang baktas.

Naabtan og kapin sa duha ka oras ang ilang prosesyon sa mga simbahan sa Visita Iglesia niadtong Huwebes sa gabii ug naabtan og tulo ka oras ang duha ka kilometro nilang prosesyon gikan sa tugkaran sa Kapitolyo paingon sa Plaza Independencia latas sa kinatibuk-ang langyab sa Osmeña Boulevard niadtong Biyernes sa gabii.

* * *

Pagkataudtaod, nangabot ang higanteng buses nga gisakyan sa mga delegado. Nalinga nang mga boluntaryo pagsenyas sa mga drayber sa buses asa dapita mohunong aron nga di magsapaw ug mas sayon ang pagkanaog sa ilang mga pasahero, labi na sa mga hamtong ug may kakulian sa panglawas, ug ang mga polis sa pagsusi sa ilang mga bagahe agi sa X-ray machines.

Dihang nagdungan og pangabot ang daghang buses, gitak-opan sa traffic enforcers gikan sa TESDA paingon sa Cardinal Rosales Avenue ang kabahin sa St. John Paul Avenue aron nga di matanggong ug makapangita og laing agianan ang ubang mga sakyanan ug mas hapsay ug luwas ang pagpanganaog sa mga delegado.

* * *

Pipila sa basiyo nga buses gipulihan og sakay sa batan-ong mga boluntaryo nga gipatabang pag-andam sa 27 ka ektarya nga luna sa South Road Properties (SRP) nga pahigayonan sa Statio Orbis, ang Santos nga Misa nga pormal nga motak-op sa IEC karong alas-4 sa hapon.

Pipila ka polis gipahibawo sab nga pabiyaon na dinhi aron makatabang sa pagladlad og dugang seguridad sa sud ug sa palibot sa Cebu City Sports Center nga maoy gipahigayonan sa Santos nga Misa nga giduma ni Cebu Archbishop Emeritus Ricardo Kardinal Vidal alang sa kaliboan ka bata nga nangalawat sa labing unang higayon gahapon sa hapon.

* * *

Matud sa mga boluntaryo nasuhito na sila sa mga gimbuhaton pagtampo sa hapsay nga pagduma sa kalibotanong kalihokan. Di hinuon sila sama kakalma sa unang mga adlaw. Ang kakuwang sa sound system sa Opening Mass sa Plaza Independencia usa lang sa mga nataligam-an kay wa pa sukad makasinati ang Sugbo og kalihokan nga ingon ini kadako.

Sa wa pa mangabot ang mga delegado, nilibot dinhi si Bishop Dennis Villarojo, labaw’ng tagduma sa IEC. Matud niya nabuntog nilang daghan uyamot nga kakulian. Apil sa kakulian nga gitug-an ni Msgr. Joseph Tan, tigpamaba sa Artsidyosesis sa Sugbo, maong pagpangabot sa kasagaran sa mga panginahanglan sa bisperas na sa IEC. Nga dihang nakasugod nang Kongreso, wa niya kapugngi ang paglugmaw sa iyang mga luha.

[email protected]