Pari nikalawat sa alagad

Nagsugwak ang mga tawo nga nanambong sa opening mass sa 51st International Eucharistic Congress kaniadtong Domingo sa hapon didto sa Plaza Independencia.

Gibana-bana nga miabot og 350 mil ka deboto ang mitambong nga nagagikan sa nagkadaiyang suok sa kalibotan, ilabi na kadtong mga delegado nga giserbahan nang daan og pwesto sa sulod sa plaza, diin giandaman sila og mga lingkoranan.

Bukas ang misa bisan sa dili mga delegado sa IEC, kinsa naghugop sa kilid ug ang uban kutob na lang gyud sa gawas sa plaza, diin giokupar na nila ang mga karsada.

Tumong sa mga tawo mao ang pagdawat sa lawas ug dugo sa Ginoo atol sa Eukaristiya.

Apan daghan ang wala makakalawat sa Eukaristiya, ilabi na kadtong didto nagpahimutang sa gawas sa Plaza Independencia, sanglit nakatutok ang halos tanan nga mga alagad sa sulod nga bahin sa plaza.

Hinoon adunay mga lay minister nga miadto sa karsada apan wala na mahuman dihang naabtan na sa panapos nga panalangin sa misa. Tungod niini, dunay nakapangutana nga limitado ba ang mga hostiyas o first come first serve basis ba usab ang Holy Communion?

Samtang dili lang unta masuko ang mga lay minister, ngano nga sila man lang ang gitahasan sa pagpakalawat? Ngano nga dili man ang mga pari nga hilabihan ka daghan?

Usa ka pari ang mitug-an nga mismo siya didto sa lay minister nikalawat. Nabali na man hinuon, pagpakita lang kadto sa humility sa pari.

Mas maayo nga mohimo og lakang ang organizer sa kalihokan aron  dili na masubli ang kasinatian sa mga tawo atol unya sa last mass o Statio Orbis nga himoon sa templete sa SRP.

Napanglantawan nang daan nga moabot og usa milyon ka deboto ang mosalmot sa last mass isip pagtak-op sa mga kalihokan sa 51st Eucharistic Congress.