Binata ni Roxas ug Duterte

Sa kasaysayan sa Pilipinas, karon pa kita makasinati og panahon sa eleksiyon nga puno sa linawgaw. Wala pa gani ang kampanya apan sama sa mga bata ang gipakita sa pipila ka kandidato sa pagka-presidente.

Sa mga kandidato pagka-pangulo, si kanhi DILG Secretary Mar Roxas ug Davao City Mayor Rodrigo Duterte ang kugi karon paglinabayay og mga alegasyon. Gani miabot na sa punto nga naghinagitay na  ang duha alang sa usa ka sukmagay.

Una nang mialegar ang mayor nga peke kuno ang diploma ni Roxas gikan sa Wharton School of Economics sa University of Pennsylvania. Reaksiyon kini ni Duterte sa pahayag ni Roxas nga dili gayud tinuod ang giingong kahusay ug kalinaw sa dakbayan sa Davao ilalum sa pamunoan ni Duterte.

Hangtud nga miabot na ang ilang away sa kahanginan ngadto sa hagit sa sinagpaay. Apan dili pa kontento ang matag habig. Dayong bira sa kampo ni Roxas nga sa sinumbagay na lamang nila daugon aron makita ang katag.

Apan matud pa sa lain nga kampo, magpinusilay na lamang hinuon sila. Puwerte nang kuyawa sa sitwasyon. Puro dili pagansi ang duha. Ug nga gusto na nga mopatay aron lamang ilhon nga maoy insakto.   

Kay kun madayon kini ug simbakong mosangpot unya sa pagkakalas sa duha ka kinabuhi, dakong tsansa nga si Bise Presidente Jejomar Binay maoy mahimong sunod nato nga presidente, ilabina kun ma-disqualify gayud si Senadora Grace Poe.

Karon, daghan na hinuon ang nangyam-id niining binata nga away tali ni Roxas ug Duterte. Klarong milihis sila sa naandang sumpaki sa mga kandidato nga mao ang pag-iyahay og plastar kun si kinsa ang adunay maayo nga plataporma.

Bitaw. Sa akong tan-aw, dili gayud deserving ang mga Pilipino niining klase sa political showdown. Pulos lamang binata ang nanggawas sa mga baba niining duha nga dili gayud kapahimuslan sa lungsod.

Mao pa kini nahitabo sa kasaysayan sa pulitika sa atong nasud. Kay kun magpadayon kining ilang inamaw nga paglinabayay og lapok, otro usab nga hanggaw ang mobotar unya niining duha sa eleksiyon sa Mayo.

Mas maayo nang mahibalo tang daan sa klase sa atong mga kandidato. Kini aron nga ato gayud sila nga mahashasan. Kay dili na kita makatugot pa nga isalig ang atong nasud niadtong nangambisyon nga wala diay hinungdan.