Gitikasan?

Wala pa g’yud mahanaw sa akong kaisipan diha nga mihimo’g grabe’ng pasangil si Grace Poe nga ang iyang amahan nga si FPJ gitikasan dinhi sa Sugbo diha nga kini napilde sa eleksyon.

Sa ato pa, kitang mga Sugboanon, giisip ni Poe nga mga tikasan. Unya karon nga nangambisyon na si Poe nga mag president, mura’g magpakiluoy na usab nato? Gibuangan si Grace sa mga Sugboanon?

Dili lagi unta dayon mohimo og pasangil kay daghang mga tawo ang sakitan niini. Sigurado ko nga dili kay ako ra ang gisakitan diha nga miingon si Poe kaniadto nga gitikasan si FPJ nga maoy nagsagop kaniya?

Ang tinuod, gusto man g’yud unta ko ni Poe kun nag bise lang siya ni Mar Roxas kay aron nga sa unom ka tuig, maantigo na siya sa mga gimbuhaton sa pagka president.

Karon gud, wala pa g’yud siya’y kasinatian nga aron angayan siya nga modumala sa nasud. Kun modaog si Grace Poe, mahimo nga laing mga tawo nga iyang suod ang maoy mohimo’g mga sugyot unya iya ra nga ipatuman. Sugot mo ana?

Pagka karon gud, sa mga miplastada na nga kandidato, si Mar Roxas ra ang maayo. Wala’y anomaliya ug suheto na pagpadagan sa kagamhanan.

Dili na kaayo ko ganahan mohisgot ni Vice President Binay kay tan-aw nako, maayo na g’yud nga pagkasukamod nga wala pa gani moabot ang eleksyon.

* * *

Tungod sa grabe’ng pamolitika diha sa Mandaue, kadaghanan sa mga konsehal mibabag na usab sa tinguha nga pausbawan og P300 ang gidawat nga Cost of Living Allowance sa mga maestro aron mahimo na nga P1,000 ang kada buwan.

Sa usa ka programa sa radyo, daghan ang misaway sa mga konsehal nga misupak sa tinguha nila ni Konsehal Lolypop Ouano-Dizon ug ni Konsehal Beethoven Andaya.

Maayo na man lang unta kadto nga puno-puno sa pangpalit og sabon sa mga magtutudlo para sa paglaba sa ilang uniporme ug plete pag-adto sa tunghaan kada adlaw.

Pastilan, klaro ug masabot g’yud kaayo nga ang gihimo sa mga konsehal nga misupak pamolitika ra g’yud abi kay ang misugyot niini, si Lolypop man ug si Beethoven nga molansar pagka mayor ug bise mayor.

Diha nga giawhag nga moisa sa kamot ang mosuporta sa tinguha nila ni Lolypop, ang miisa sa kamot mao ra g’yud si Konsehal Ben Basiga.

Ang mga misupak paghatag og dugang P300 nga COLA sa mga magtutudlo mao sila si Konsehal Editha Cabahug, Jun Cortes, Daddie Suico, Nenita Layese, Jimmy Lumapas, Tony Dabon ug Jaypee Ceniza.

Sa Cebu City ug Lapu-Lapu City ta’g P1,500 na man gani. Luoy baya pud ang mga maestro ug maestro.