^

Banat Opinyon

Segurong laslas sa plite

- Leo Lastimosa - Banat

Ang bisan unsa nga nadugang sa ilang inadlaw’ng kita tungod sa mas baratong mga produkto sa lana napapas ra sa pagtidlom sa ilang mga pasahero tungod sa kahuot sa trapiko. Mao ni ang gitataw sa mga drayber sa taxis ug public utility jeepneys (PUJs) nga niduaw sa among sibyaanan aron pagpadayag sa ilang pagsupak sa petisyon paglaslas sa plitehan sa mga sakyanang pamasahero.

Si Kongresista Manny Iway sa Negros Oriental maoy nipasaka sa petisyon sa ulohang buhatan sa Land Transportation Franchising and Regulatory Board (LTFRB). Nipasalig si LTFRB Chairman Winston Gines nga husayon dayon nila ang petisyon ni Iway ug mahimong kalaslasan nang plitehan sunod buwan.

* * *

Si Iway ang responsable sa paglaslas sa plitehan sa PUJs ug taxis sayo karong tuiga. Tungod sa kakuwang og lig-on nga kahugpongan sa mga pasahero sa Sugbo ug ubang bahin sa nasud, si Iway ang nahimong kampeyon sa ilang kawsa nga makaangkon og makiangayon nga bahin sa dako na kaayong tibugsok sa presyo sa lana.

Nahibawo si Iway sa iyang gihimo. Di lang siya kanhi regional director sa LTFRB sa Central Visayas, natudlo pa gyod siyang komisyonado sa LTFRB. Atol sa iyang paglingkod sa ulohang buhatan sa LTFRB, si Iway nihupot sa labing kusganon nga baruganan pagpanalipod sa interes sa mga pasahero sa plitehan ug ubang kontrobersiya.

* * *

Wa mohinayon ang Cebu Integrated Transport Cooperative (CITRASCO) pagpasaka og petisyon paglaslas sa plitehan sa PUJs. Kay gisupak sa pipila ka sakop ang baruganan sa ilang pangu nga si Ryan Benjamin Yu nga angay’ng moboluntaryo paglaslas sa plitehan kay di malalis ang dakong tidlom sa presyo sa lana.

Apan nitataw si Iway nga wa na kinahanglana ang laing petisyon. Ang iyang petisyon naglakip na sa tibuok nasud. Nanghipos ang iyang buhatan sa nagkalainlaing plitehan sa Sugbo ug ubang lalawigan gikan sa rehiyonal nga mga buhatan sa LTFRB aron nga makaangkon silang Gines ug kaubanan sa nasudnong hulagway sa plitehan sa mga sakyanang pamasahero.

* * *

Nanghinaot si Iway nga ang sentimento sa mga drayber nga naapiki sa trapiko sa Sugbo maapil sa hiniusang baruganan sa transport groups batok sa iyang petisyon. Kay suhito man sa mga lagda sa LTFRB nahibawo si Iway nga ang sunod nga mahitabo mao ang publikasyon sa iyang petisyon aron nga mahibawo ang tanang hingtungdan.

Gipaabot niyang itakda nang public hearing sa di pa matapos kining buwana. Gidapit niya ang mga pasahero sa Sugbo ug ubang mga lalawigan sa pagpada og mga representante sa ulohang buhatan sa LTFRB aron nga di siya rang usa ang magtikaw-tikaw didto atol sa husay. Naneguro si Iway nga tungod sa padayon nga dakong us-os sa presyo sa mga produkto sa lana, kalaslasan gyong minimum nga plitehan.

[email protected]

ANG

CEBU INTEGRATED TRANSPORT COOPERATIVE

CENTRAL VISAYAS

IWAY

LTFRB

MGA

NGA

PETISYON

PLITEHAN

QUOT

SUGBO

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with